七仙羽被指冇料冇邏輯 社交網站出PO回應：爲了一點點的破收視 踩完別人 你睡的平安嗎？

人氣玄學家七仙羽（七師傅）憑無厘頭嘅主持方式、出位金句及「譚仔式廣東話」喺呢兩年成功彈起，除咗有唔少廣告商搵佢代言之外，ViuTV新春節目《七福星》亦喺噚晚（24日）首播，真係周圍都見到佢嘅蹤影。不過人紅自然是非多，今日凌晨七仙羽喺社交網站出PO指有人批評佢冇料冇邏輯，藉住七師傅嘅名氣去吸引人留意自己嘅節目，仲話呢個人唔了解佢就編故事炒作。

繼《七救星》後，七仙羽聯同陳安立（Brian）、王頌茵（Kathy）、J.Arie及郭奕芯（Ashina）主持ViuTV節目《七福星》，七師傅繼續喺新一年為大家送上歡樂。不過七師傅個人就唔多開心， 罕有喺社交網站「爆seed」出PO話：「任何人在網上罵我丶攻擊我丶不斷踩我....然後藉我名氣吸引別人留意你的節目...等等，我全部都非常清楚你們都做些什麼！！！我真誠的勸你，種何因得何果，不惜犯口業踩低我，你不會有什麼好結果，因為你用的方法大錯特錯！！！我修煉過什麼法，你不清楚！我心地善良處事爲人，你不清楚！你根本不了解我，就編些故事炒作，我覺得你....哎，好cheap，真的！你根本太膚淺，真的，請謙虛一些多學一些知識，宇宙好大，未知的東西太多。我日覆一日年覆一年在印度丶尼泊爾丶克羅地亞丶蘇格蘭等地修煉....你的頻率根本達不到那種層次，所以，你不懂我！世界之大，人外有人，記住，謙受益，滿招損。不要用你的觀點審視我的境界好嗎？我拍這麽多的節目，說了好多次，主要原因希望大家開心，帶給大家正能量，身心靈都健康，佈施給大家。你說我冇料冇邏輯....我不介意。我擁有幸福的家庭丶物質的豐盛丶大衆的支持和喜愛....你咁有料，那你會爲自己也擺個風水陣嗎？誰有料？已經好明顯！廣結善緣你懂嗎？你結下惡緣，你未來的路只會越來越窄！奉勸你，培養善良的心，把口不要太惡毒，佛經說，心地壞、惡口之人會好醜陋！爲了一點點的破收視，踩完別人，你睡的平安嗎？」七師傅喺文中並無指名道姓，因為佢喺回應網民時話：「不想中此人計，偏偏不公開此人名」。

呢個PO一出，ERROR成員保錡留言支持「師傅愛你，七師弟係度! You are the best」。另外，大批網民亦留言力撐七師傅，例如「欣賞師傅有見識、有學識、有膽識，層次呢家嘢真係各人不同，我好鍾意睇七師傅，多謝師傅嘅正能量，睇親都好開心」、「真係唔好為咗啲無謂人動氣。其實我係天主教徒，但係我都有睇你，正如你所講，你為大家帶嚟正能量，睇你我覺得好開心。」、「人哋層次都未到，你點講人哋都聽唔明架啦，佢而家種下嘅惡果第日一定食晒仲加倍收返。佢自己唔鍾意就算，唔好阻住師傅帶比我哋歡樂！」、「我們愛師傅」、「師傅唔好嬲，唔洗理其他人點講的」、「喜歡七師傅妳的善良，真誠。好鍾意睇妳嘅節目。帶比我哋歡樂，睇完心情都好好。支持妳 妳是最好的」、「佢地唔抵得師傅咁紅呀」、「七師傳好嘢 七福星好好笑，睇得好開心」及「七師傅 加油 唔好理啲無謂人呀」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！