七師傅身價急升拍得住MIRROR姜濤？《七福星》引發廣告商冠名贊助爭奪戰

玄學家七仙羽（七師傅）憑搞怪性格與出位金句喺呢兩年成功彈起，不斷有廣告商搵佢代言，成為「廣告女王」；據悉七師傅而家每次出騷價已升至約48萬，每個社交平台廣告帖文約18萬，身價可以話係10級跳，仲同姜濤有得揮。

據知七師傅短短幾個月內就接拍咗多達40幾個廣告，包括時裝、護膚品、銀行、連鎖米線舖等唔同類型廣告範疇，早前又參演葉念琛執導嘅賀歲電影，及為張敬軒紅館演唱會擔任表演嘉賓，與張敬軒合唱《月亮代表我的心》，除咗一出場就得到全場觀眾核爆式歡呼叫聲，仲與張敬軒互錫面珠，引嚟起哄同時炒熱現場氣氛。

七師傅人氣有增無減，仲吸引到廣告商爭相贊助，就好似即將播出嘅《七救星》續集《七福星》就引發一場廣告商冠名贊助爭奪戰。除此之外，連鎖米線舖又搵嚟七師傅與鄭欣宜齊齊拍攝新廣告，七師傅今次以一身紅噹噹旗袍造型示人，又繫上春麗髮髻，以迎合農曆新年節慶感；為咗遷就七師傅檔期，工作團隊不惜要喺凌晨開工，連踩28小時馬拉松式拍攝，七師傅表示呢次係入行以來最長嘅一次開工時間，所以佢都好識做，向現場工作人員大派利是，據知出手仲好闊綽。

近日，七師傅又再一次為連鎖米線舖全新米線系列拍攝廣告，與黃德斌談情做情侶，演繹富家女與賣魚佬嘅愛情故事，七師傅喺廣告中戴眼鏡、著格仔恤衫牛仔褲演繹情竇初開感，佢仲表示好開心可以同男神黃德斌合作：「好多謝有德斌帶我入戲，我們用了半小時培養感情，練跳舞，還有床戲已相當心足。我更向導演提議二人情深望擺出『師傳愛你』的心心手指甫士，為了這個鏡頭我們NG了幾次，我更開玩笑想導演加接吻戲自肥。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！