七救星|七仙羽搞怪主持風格惹人爆笑 網民:師傅最愛你

《七救星》截圖
《七救星》截圖

玄學家七仙羽(七師傅)嚿年因主持ViuTV靈探真人騷節目《鬼同你上位》爆紅,除咗「譚仔式廣東話」之外,網民亦欣賞七師傅無厘頭嘅主持方式以及其金句,直言:「七仙羽唔紅,天理不容」。近日由七師傅擔正主持嘅新節目《七救星》正式播出,七師傅喺助手陳安立(Brian)及王頌茵(Kathy仔)協助下,為嘉賓進行改運大法;七師傅一如過往無厘頭,仲有唔少「自肥」搞笑位,節目播出一星期好評滿滿。

節目首集搵嚟林作母子同裕美做嘉賓,七師傅為改善佢哋關係而念經,後來指自己念嘅係難念的經,令人哭笑不得:「我當時念緊嘅係難念的經,每個屋企都會有」。之後嘅集數邀請到杜如風、小肥、郭奕芯等等,而最新一集七師傅就幫練美娟(娟姐)訂做咗個結婚沖喜套餐以加強姻緣運。

七師傅同練美娟喺節目中著上禮服喺一眾賓客面前「結婚」,不過七師傅隨即宣佈「離婚」,向男友阿龍詢問:「寶貝,你願意娶我嗎?」二人相擁接吻並與在場賓客合照,七師傅搞笑解釋其自肥計劃:「我同我男友都好忙,橫掂個婚禮都搞咗,我就同佢結婚,但佢都未知。不過,唔緊要,呢個係我嘅計劃!」七師傅接受媒體訪問嗰陣就話呢次節目係無主持稿,全部都係自由發揮;雖然唔少網民都對七師傅嘅主持方式搲爆頭,網民仲喺討論區以「七救星係咪已經超越左error自肥企劃?」為題開帖文,大量網民留言指唔知自己睇緊咩,但又覺得好好笑,仲大讚節目內容節奏夠快:「ViuTV專長就係拍呢D『我到底睇咗乜』嘅節目,好快咁就睇咗半粒鐘」、「以前我都覺得佢係神棍妖道,但依家睇佢真係好好笑」、「最好笑嗰個位係佢個樣好認真咁做啲搞笑嘢」及「可唔可以同我講師傅最愛你」等等。

《七救星》截圖
《七救星》截圖
《七救星》截圖
《七救星》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!