雅虎香港新聞 上環新開親民價花膠主題餐廳 創意麻辣花膠意粉+芝士花膠多士
花膠充滿骨膠原，係唔少女士嘅養身恩物。想食但又無時間自己炆？上環海味街附近就有一間以花膠為主題嘅餐廳啱啱開業，店內供應超過三十款菜式，八成都以花膠入饌，融合中西特色又夠創意。雖然以花膠為主題，但價錢都好貼地，對中上環嘅上班族及街坊們係一個唔錯嘅選擇。
菜式主要選用來自冰島鱈魚膠，亦有菜式用較貴價嘅鰵魚花膠。花膠向冰島相熟供應商拎貨，喺大澳生曬後才運至餐廳，然後浸水三日至軟身，再以古法鮑魚汁扣一整日。負責人Goman表示， 為求品質更一致，佢哋入貨時會特意揀較深色的花膠， 膠質會更重。
將中式嘅麻辣及花膠融入西式意大利麵中，意外地味道又幾夾。加洋蔥、白酒及自家製麻辣醬炒香意粉後加入花膠，兩者都吸收晒麻辣香，意粉亦炒得乾身，先麻後辣好惹味。
超足料嘅海鮮飯！除咗加入帶子、蝦及魚外，面頭加埋較貴價嘅鰵魚花膠及原隻鮑魚，鰵魚花膠大大塊，口感軟腍重膠質，啖啖都係骨膠原。飯嘅番茄汁亦都係自家製，先將番茄及雜菜炒香再熬製4-5小時，絕不加入茄膏，味道自然清新。
湯底用骨膠原比較豐富嘅門鱔骨熬製，再加上自家製番茄湯底，味道濃郁，天使麵夠幼身好掛湯，配埋花膠食真係一流！
咖喱飯用新加坡咖喱，椰香味較重，有花膠、原隻鮑魚、帶子、蝦及魚五種海鮮，同樣咁足料！
蝦多士就食得多，花膠多士又食過未？烘得香脆嘅多士上加花膠及芝士，香脆惹味。
地址: 上環德輔道中323號西港城地下1號舖
文: Yanica
相、片: Tom Li
