上環開揚清酒咖啡店 創新日系西餐 慢煮牛肩配茄子醬

Café愈開愈多,有以打卡為招徠嘅、有主打精品咖啡嘅……各種唔同旗號都有。上環呢間則以結合清酒同咖啡為主,更自創一系列創新嘅西日fusion菜式,由早到晚都為大家提供一個開揚舒服嘅用餐環境。

呢間café本店喺中環,以roll cake同咖啡打響名堂。今次進駐上環開分店,全店都係落地大玻璃,採光度高,樓底又高,空間感十足,更加入多款主食菜單。先介紹幾道自家創作嘅前菜,漬三文魚子炸北海道帶子配酒盜及忌廉芝士,用新鮮帶子製作成半刺身口感,外層炸得香脆,而且用埋酒盜同忌廉芝士去提鮮,又有柚子汁作平衡,無論鹹香定鮮味都大爆發。

絹豆腐比一般嘅豆腐更滑,日本酸汁漬車厘茄佐鹽滷絹豆腐口感自然香滑,微酸清新,作為前菜絕對做到開胃嘅功能;炸木棉豆腐配皮蛋醬汁醋漬薑片有啲皮蛋豆腐嘅感覺,變奏成西日輕食版又幾夾。炸過嘅豆腐外脆內軟,皮蛋汁唔算太濃味,混和薑片同酸汁反而有種清新感覺。

比較特別嘅有生牛肉他他拼日本腐皮及漬蛋黃,加埋醃蘿蔔同洋蔥落去,中和咗牛肉濃烈嘅味道。平時嘅他他多數都會配脆多士,但呢度就配日本腐皮,都係個唔錯嘅嘗試。不過由於食落同牛肉他他差唔多都係軟身感覺,口感層次就冇咁豐富。

店主本身係一名唎酒師,對清酒非常熟悉,除咗有happy hour同限時任飲嘅時段外,佢更特別為每道晚巿菜式挑選咗配搭嘅清酒。好似燒慢煮牛肩配大蒜佐茄子醬呢類濃味少少嘅嘢食,推介可以配搭酒體圓潤、米香中又帶有堅果香嘅加賀之月 滿月 純米吟釀。牛肩肉慢煮完再以炭火燒香外層,搽埋gin酒喺肉面,帶出陣陣肉香。將茄子打成醬係幾有驚喜,甜甜地中和返膩感,不過係份量細咗少少。

師傅特意選用法國豬架製作燒豬鞍配紫蘇醬,經過炭燒後肉質細嫩,帶有微微炭香,但味道本身相對較淡,建議可點伴碟嘅紫蘇醬。而配搭果香感重(蜜瓜、香梨等果味)嘅森嶋 美山錦 純米吟釀,感覺亦較清爽。

至於大蜆意式燉飯就可配過桶熟成嘅FUSION 2021 長陽福娘 香港限定版,兩者都帶有陣陣奶油香呢。

當然,咖啡先係主角。呢度嘅咖啡豆主要由日本引入,由日本職人烘豆師烘焙。咖啡味道層次豐富,甘苦以外,同樣可以帶有花香果香甜或堅果香等,真係要慢慢嘆真啲㗎。

洋服咖啡清酒店

地址: 上環蘇杭街89號地舖

文、相、片:Kar

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能