下流上車族｜羅毓儀爆喊戲好搶鏡 識日語識電子結他兼出過原創小說

TVB台慶劇《下流上車族》正在熱播中，劇集由實力派演員鮑起靜、江美儀及林敏驄，再加上郭柏妍、羅毓儀（Yuki）及丁子朗等新晉演員出演，講述車家用盡下流手段為求上車成功。唔少網民都大讚劇集題材夠貼地，兼大讚演員表現出色，當中包括羅毓儀。

劇集最新劇情就講到車蔓蔓（羅毓儀飾）本來喺加拿大讀書，不過燒咗一隻死咗嘅白鴿嚟食，因違反候鳥保護法而被踢出校兼被取消簽證。佢返到香港爆喊咁同媽媽雯慧（江美儀飾）講喺他鄉嘅慘況。之後，蔓蔓喺街頭見到一隻垂死嘅鴿子，並將佢帶到獸醫診所，期間仲認識咗Emma婆婆（鮑起靜飾）。Emma婆婆喺安慰蔓蔓期間仲知道咗阿仔（林景程飾）打算將佢送往日本老人院，而唔係同住，佢只係想將次郎帶去日本。Emma婆婆喺確認阿仔嘅意圖後，就急求蔓蔓幫手照顧次郎，期間雯慧爽快答應俾次郎托管喺家中，原因係想謀取Emma婆婆嘅高昂租金。

唔少網民睇過佢嘅演出後，紛紛留言大讚，例如「你個角色好可愛，好sweet」、「加油呀，演技有進步，呢套戲真係好睇」、「睇咗演得幾好,支持蔓蔓」、「演技有進步」、「演得好好 支持 繼續努力」、「琴晚果場喊戲演得好好 加油」及「你喊嗲阿媽原諒場戲，真係演得好唔錯,換轉係我都嬲唔落」等等。前晚（19日）嗰一場爆喊戲，Yuki得到唔少網民讚賞，佢喺接受傳媒訪問時就話自己曾經去過外國讀書，人在異地真係會好掛住屋企人，所以佢喺準備時都會諗返以前嘅事，去令到情緒容易啲代入。

現年26歲嘅羅毓儀。2018年喺香港城市大學以一級榮譽成績獲得工商管理榮譽學士（商業營運管理）學位，而佢所講嘅曾經去過外國讀書，就係佢喺大學三年級曾前往維也納大學參加交流生計劃。Yuki喺2019年參加無綫第30期電視藝員訓練班入行，畢業後即有機會參演劇集拍攝，而且演出機會不斷，例如《星空下的仁醫》、《青春不要臉》及《痞子殿下》等等，當中憑處境劇《愛·回家之開心速遞》中人氣作家「路小小」及《黯夜守護者》中梁敏詩（Maisy）獲網民高度關注。

羅毓儀仲係一名才女，佢曾經以筆名「一粒雪」推出小說《天賜之子·不死鳥》。另外，佢擅長彈電子吉他、鋼琴及唱歌 ，喺入行前仲曾教過學生玩電子結他，而佢仲有組成業餘樂隊MochiIce公開表演，佢擔任結他手，而男朋友就係鼓手。原本係YouTuber嘅佢，同男朋友一齊經營影片頻道，除咗參與角色扮演，略懂日語嘅佢仲會翻唱日語歌，真係多才多藝呀！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！