「下流父女」冇面畀 郭柏妍自嘲浴室歌手 林敏驄寸失禮

郭柏妍坦言唱歌不是強項,演出前會努力練習。
郭柏妍坦言唱歌不是強項,演出前會努力練習。

「下流父女」林敏驄與郭柏妍昨日為慈善節目綵排,首次在螢光幕唱歌的郭柏妍坦言心情緊張,並自嘲是「浴室歌手」,即被「父親」林敏驄取笑:「咁一定失禮啦!」

《歡樂滿東華2022》今晚在將軍澳電視城舉行,林敏驄、郭柏妍、鄧志堅、文凱婷與何晉樂等昨日為籌款表演項目綵排,獻唱《下流上車族》主題曲《一家人》。

郭柏妍表示首次表演唱歌,自嘲是浴室歌手,身為「Daddy」的阿驄笑言:「咁一定失禮啦!」身為候選視帝的阿驄被問會否趁東華演出拉票?他說:「冇人通知我喎,完全唔知發生咩事。你都應該話畀我知個遊戲規則係咩,好似入圍咗世界盃,都話畀我知打唔打越位、可以換幾多個人,你哋問到我唔知點答,細嗰啲又答唔到,大嗰啲又擰轉面!」

民選視帝心滿意足

阿驄坦言不清楚投票準則,問到為何不找老友無綫總經理曾志偉詢問?他說:「佢人間蒸發咗,播完套劇都冇聽過佢把聲。(佢過橋抽板?)用完就咩㗎啦。(你係視帝熱門喎!)人哋民選畀我已經好開心,唔知邊場戲出咗,話直接頒畀我,已經好開心,我Feel到佢哋每一個係真心頒畀我。(通知你參加頒獎禮,你去唔去?)隨傳隨到呀?到時先算啦。」又稱最近忙於籌備演唱會,問到會否邀郭柏妍做嘉賓?他笑言:「睇吓唱得好唔好啦,我要賣飛㗎!」

而郭柏妍是「飛躍進步女藝員」熱門之一,問到可有攞獎信心?她說:「我最想《下流上車族》攞最佳劇集,Daddy你會唔會嚟?你係我哋最重要嘅台柱,我邀請你嚟。」有乖女氹番的阿驄笑言:「你代我攞啦!」

郭柏妍希望林敏驄出席台慶頒獎禮,「一家人」齊齊整整。
郭柏妍希望林敏驄出席台慶頒獎禮,「一家人」齊齊整整。
文凱婷與何晉樂都是唱得之人,表演唱歌冇難度。
文凱婷與何晉樂都是唱得之人,表演唱歌冇難度。