不再沙漠系列 - 東涌篇

·3 分鐘文章

唔少以前被稱為美食沙漠嘅地方都今時唔同往日喇!上次介紹完將軍澳(不再沙漠系列 - 將軍澳篇)有咩新美食餐廳,今次到東涌區!東涌近年有酒店新落成,又有全新商場T Bay灣景薈,所以吸引咗唔少特色餐廳進駐,特別係異國風餐廳。無論你鍾意食傳統西式扒房、墨西哥菜定黎巴嫩菜都有得你揀~

摩登西式扒房 The Upper Deck 

喺香港地食扒選擇好多,但質素有時都幾參差,不過東涌呢度都有一間高質扒房呀。招牌係21-30日乾式熟成牛肉,一共有五個唔同部位同份量畀大家揀,多人去食嘅必叫美國頂級乾式熟成牛肋扒1公斤或1.2公斤,份量真係超澎湃,啱晒打卡!一切開係超粉嫩嘅顏色,入口牛味極濃,平時食開五成嘅建議可以試下三成熟,因為牛扒已經經過一個月自然熟成,會有一定熟度。另外餐廳仲有自家熏制肉類、自家製漢堡、意粉及燴飯等選擇,環境闊落摩登,絕對係聚會好去處。

圖: lhjchan、yuk_tamhy
圖: lhjchan、yuk_tamhy

全新黎巴嫩菜 Maison Du Mezze

未有得飛住,又想感受下異國風味,可以去呢間啱啱先新開冇耐、位於酒店內嘅黎巴嫩菜,供應一系列傳統黎巴嫩菜式。招牌鷹嘴豆泥炒碎羊肉Hummus Kawarma,新鮮鷹嘴豆泥配上炒羊肉,羊肉膻味唔算濃郁,配埋特色麵包食好夾~另一款黎巴嫩燒雞串Shih Tawook都係必試,配搭嘅檸檬乳酪醬令成道菜味道層次更豐富;仲有炸餃子拼盤,炸粉厚薄啱啱好,點埋辣醬食仲惹味呀。

圖: JeffreyWan773er
圖: JeffreyWan773er

露天餐廳酒吧 Cabana Breeze 

食飯想食埋個景,東涌呢間餐廳酒吧有分室內用餐區同露天座位區,露天座位以金色為主,加埋幾張籐椅位,啱晒打卡,仲可以帶埋毛孩去呀。餐廳由摩洛哥籍嘅師傅擔任行政總廚,供應多款新鮮海鮮、石窯爐烤焗pizza同乳豬等,推薦大家食意式薄切生牛肉片,加入松露沙律醋、36個月熟成巴馬臣芝士片同火箭菜,口感豐富外仲食到牛肉鹹香。意大利式烤乳豬係石窯爐嘅出品,皮脆肉滑又多汁。海鮮控要叫埋呢個雜錦海鮮塔,有波士頓龍蝦、松葉蟹蟹腳、生蠔、熟蝦同青口,食完真係好滿足!

圖: lhjchan、XXJNGXX
圖: lhjchan、XXJNGXX

海景墨西哥菜 La Vista 

一樣有outdoor位置嘅正宗墨西哥菜,餐廳採用落地玻璃設計,就算坐室內都有海景睇~必食嘅墨西哥tacos有多款口味,如雞肉、牛肉、牛油果同磨菇口味等,開胃之餘仲夠晒IGable!墨西哥捲餅一樣有雞、牛、豬同磨菇揀,加入多款香料,重口味人士一定鍾意食~仲有傳統甜品churros,炸得香脆熱辣辣,點埋焦糖醬食真係無得輸!

圖: ms.Kammi
圖: ms.Kammi

驚喜港式小食 最好味美食

想平民啲嘅,富東街市內最近都開咗間小食店,而且口碑都唔錯添!最推介係佢哋即叫即做嘅炒粉麵飯,沙嗲牛肉炒河有驚喜,加入大量嘅沙嗲醬去炒,微微香辣好惹味;唔少人至愛嘅乾炒牛河都夠晒鑊氣,而且炒得唔算油,份量又大份,有時懶唔煮飯買嚟食都唔錯~另外仲有燒賣、魚蛋同煎釀三寶等港式小食,東涌街坊們可以一戰!

圖: sumsum08、tonyting316421
圖: sumsum08、tonyting316421
我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能