《丫鬟大聯盟》靚靚丫鬟成員好吸睛 網民收睇:劇情輕鬆吸引

《丫鬟大聯盟》劇照
《丫鬟大聯盟》劇照

由黃心穎及湯洛雯擔正嘅無綫新劇《丫鬟大聯盟》喺星期一(12月30日)已經開始播出,不過受到黃心穎嘅「安心事件」影響,唔少網民都打算罷睇呢套劇。不過人係永遠現實,套劇有咁多靚女,而且劇情輕鬆,唔睇咪好浪費?!

古裝喜劇《丫鬟大聯盟》主要講述以裘府丫鬟月盈(黃心穎飾)為首嘅六部丫鬟組成聯盟,佢哋互通消息兼齊齊搵錢。另外,月皎(湯洛雯飾)為咗籌錢俾愛郎傅有為(謝東閔飾)上京赴考,不惜賣身為婢,同月盈分別服侍大夫人(郭少芸飾)及二夫人(張慧儀飾),佢哋各為其主,所以經常互相鬥法。睇咗幾集,唔少網民都話劇情夠晒輕輕鬆鬆,得閒睇下都唔錯。

《丫鬟大聯盟》劇照
《丫鬟大聯盟》劇照

劇名講明叫做丫鬟大聯盟,咁丫鬟又點止得一個呀!劇集今次搵咗8位演員飾演丫鬟,除咗黃心穎及湯洛雯之外,仲有陳婉婷、周梓盈、何艷娟、張美妮、陳靖雲及馮素波。2012年落選港姐「靚湯」湯洛雯樣靚身材正,演出機會多多,今次喺劇中飾演月皎/莫小翠,當然繼續深受一班網民追捧啦!飾演美彩嘅周梓盈,係前女子組合Donut成員,佢憑《開心速遞》中飾演大小姐秘書「垃圾清」而成功入屋,不過佢12月31日喺社交網站宣布已經離開無綫。

除咗以上兩位《愛‧回家》靚女之外,網民仲勁buy喺劇中飾演桐香嘅陳婉婷,有「最索丫鬟」之稱嘅佢,今次嘅古裝扮相依然出眾,唔少網民都大讚佢靚,不過上年佢已經喺社交網站宣布離開無綫。以為靚女只局限於後生女?現年39歲嘅「人母」張美妮,1999年參加第13期無綫電視藝員訓練班入行,入行後主要工作大多數為節目主持及參與唔同劇集角色。啱啱19年先誕下囡囡嘅佢,現時仍然咁好身材。

《丫鬟大聯盟》劇照
《丫鬟大聯盟》劇照

洪永城(Tony)過檔無綫後即被力捧,除咗主持旅遊節目,2014年開始佢仲參演唔少劇集。一向被人批評演技嘅佢,終於喺上年嘅《大帥哥》被讚演技有進步。今次佢喺《丫鬟大聯盟》擔任男主角,戲份甚多,劇中飾演少爺裘其進,與月盈(黃心穎飾)情投意合,不過受到父親(鄭子誠飾)打壓,佢哋只好轉地下情。其實大家喺上一套《多功能老婆》先睇完佢嘅演出,今次《丫鬟大聯盟》又見到佢,唔少網民已經話唔想再睇到佢。其實嚟緊下星期一(6日)首播嘅《黃金有罪》都有佢嘅演出,唔知無綫係唔係想試下大家嘅底線呢?

《丫鬟大聯盟》劇照
《丫鬟大聯盟》劇照