中女唔易做｜杜如風任理貨員賴老花執唔到貨 「扮工」獲網民受落

ViuTV節目《中女唔易做》請嚟一班娛樂圈「中女」打工，結局篇由杜如風同朱薰壓軸出場。早前，一班網民批評楊思琦返工返得hea，但最新一集播出，「世界級港女」杜如風明正言順「扮工」，網民卻好受落，仲大讚佢「扮工」過程好搞笑，睇得好開心。

杜如風入行前曾做過電視台編劇、電影編劇及市場策劃，指喺寫字樓返工對佢嚟講好辛苦，而呢次節目中佢就挑戰網上超市理貨員及外賣員，負責上貨、執單及送外賣。全程由同事Fanny傍住，首先學習點用電話檢查貨物存貨及所在位置，之後學嘟貨、入袋、執單等。但杜如風喺過程中，就全程「扮工」而且藉口多多，話自己老花睇唔到barcode，電話又無電所以檢查唔到存貨；執貨嗰陣搵唔到上架位置，就隨手將貨物放入紙箱，笑指：「我一路喺店度執嘢，將啲貨擺嚟擺去，我咪唔使做其他嘢？」

幫手執訂單送貨方面，杜如風直言輕鬆，好似玩緊遊戲節目，當執到衞生巾時，佢就笑言自己已停經，搞唔清楚衞生巾長度，又表示避孕用品唔知出唔出得街：「其實呢啲出唔出得㗎？呢啲唔啱我，我冇性生活！」執訂單正常速度應該係3分鐘就可完成一張訂單，而杜如風則用咗近18分鐘，仲表示自己打破同事歷年嚟最慢執貨紀錄。雖然杜如風擺明「扮工」，但網民大讚杜如風貼地又搞笑，留言指：「一如往常地hea做」、「睇到佢真係好好笑」、「等佢送餐應該會餓死」、「睇預告係坐的士送外賣」等等，仲話佢擺明夢遊，但同楊思琦係兩回事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！