中年好聲音3|黃凱芹被狠批唔適合做評判 陳奐仁窒對方畀滿分行為 Chris:擺明同我結怨喎
TVB歌唱真人騷《中年好聲音3》迎來陳奐仁和黃凱芹擔任新評審,二人皆表示評分準則唔會太嚴厲,會以鼓勵和幫助角度較多;陳奐仁和黃凱芹於日前(26日)播出一集登場,成為節目焦點,不過黃凱芹嘅表現就批唔識做評審,更加點名Eric Kwok、巫啟賢、海兒及劉美君回歸。
著名音樂人伍仲衡疑因截糊與洪心怡簽約,令TVB嬲豬叫停《中年好聲音3》評判工作,雖然陳奐仁和黃凱芹分別指於稍早時間已接到邀請,與伍仲衡嘅離開純屬巧合,但唔少網民都認定二人係頂替伍仲衡位置,又將佢哋與伍仲衡比較,表示伍仲衡畀到搞笑氣氛觀眾,認為新評審未能做到娛樂性,尤其係黃凱芹表現較差,更指唔明佢嘅評分標準,認為佢畀分嗰陣明顯較鬆手;上集MVP劉洋率先出場演繹張敬軒歌曲《只是太愛你》,令黃凱芹畀咗20分滿分,更表示對方好到無畀機會評判扣分:「你一出場我就畀你20分,有失誤嘅地方我就會扣你分,但我好難捉到你失誤嘅地方,你嘅表情、感情、台風、音色真係超過咗,總分係20分,其實我畀多過20分,總之你係無機會畀我扣到你分,所以你有20分。」不過,其中一位評審張佳添就指劉洋選嘅歌稍稍曝露咗其弱點:「喺主歌部分無論節奏感、句法嘅拿捏、咬字嘅仔細度都係略欠嘅」;陳奐仁又認為劉洋喺第一段主歌唱得太大力,建議佢細力啲及用多啲氣聲,因此並唔係黃凱芹所講嘅無可挑剔。
黃凱芹嘅扣分制評分方法亦被陳奐仁批評,笑言如果係扣分制,呢到係中年跳水比賽,又解釋自己點解畀17分:「因為你擺明可以唱得更加好,如果一嚟畀你20分,姐係表示夠了,唔好進步啦,咁對你地唔公平。」,黃凱芹追問:「你即係話我啫?擺明同我結怨喎依家。」陳奐仁望向觀眾席回應指:「其實我係話佢(Chris),但佢唔使咁小氣。」場面充滿火花又搞笑。網民紛紛批評黃凱芹:「黃凱芹唔適合做評判,因為佢唱歌都唔好聽」、「其實劉洋係ok,但20分就誇咗,有咁完美咩?」、「真心唔覺得佢值20分!有啲音佢唱到拆晒聲,Chris要去驗耳!」、「黃凱芹真係好老態。做評判又有啲悶。標準有啲奇怪」、「黃凱芹講嚟講去嗰幾句」、「黃凱芹做評判完全唔掂,亂咁比分亂咁嗡」等等。不過,都有網民認為毎位評審都有自己唔同準則和輕重:「他衡量過後値得比滿分而無偏心就ok啦」、「我buy Chris 嘅扣分制」、「D(啲)人一時一樣,唱得好俾滿分又話,唱得好俾16分又話,叫D(啲)評審點比分?」、「人哋咪話咗佢用扣分制,佢自己有個list,全部達到到咪滿分」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!