中環新兩層高和洋系咖啡酒吧 酒粕Latte+油封雞腿有驚喜

·3 分鐘文章

全新和洋風格嘅餐廳最近進駐中環,唔單止集咖啡店、酒吧同餐廳於一身,菜式亦有齊日式、西式同Fusion等唔同選擇。日間可以嚟嘆咖啡配早餐,夜晚嚟飲Cocktail配西餐得,飲日本清酒配燒鳥亦得。同樣鍾意和洋風格嘅朋友必試酒粕鮮奶咖啡!

TRIPLE C位於中環,品牌靈感嚟自三個C:Coffee咖啡、Cocktail雞尾酒同Canapés小食。餐廳樓高兩層,都係以黑色、原木、水泥牆為主軸嘅時尚型格風格為主。地下有開放式酒吧,二樓則設兩間六至八人房、可作為私人Party場所。

酒粕鮮奶咖啡($54/熱、$58/冷)
酒粕鮮奶咖啡($54/熱、$58/冷)

House Blend選用巴西及危地馬拉咖啡豆拼配而成,中深烘焙偏堅果風味。最特別嘅係酒粕鮮奶咖啡,顧名思義係將日本清酒酒粕加到鮮奶咖啡當中,聞落除咗咖啡嘅榛子同可可香,仲會有清酒嘅香氣!飲落就係類似酒釀嘅甜米香,估唔到同咖啡又幾夾。表面加上蜜糖,中和酒粕嘅辛辣口感,更易入口。

紫薯鮮奶咖啡($54/熱、$58/冷)
紫薯鮮奶咖啡($54/熱、$58/冷)

而呢杯帶紫色嘅紫薯鮮奶咖啡就以日本紫薯配搭鮮奶咖啡,真係飲得到底部有唔少紫薯蓉,甜味自然討好。適合平時覺得咖啡會有酸味或者苦味嘅朋友入門。

和風枝豆牛油果多士($108)
和風枝豆牛油果多士($108)

餐廳朝早八點開始營業,供應一系列和洋元素早餐,例如將Cafe常見嘅牛油果多士加上枝豆!Creamy柔滑嘅牛油果同帶粒粒口感嘅枝豆感覺都非常健康,舖喺外脆內軟又有牛油香嘅多士上面,豐富又無負擔感。

和風明太子意粉($168)
和風明太子意粉($168)

意粉同飯亦有多款選擇,和風明太子意粉就加入大量日本明太子,每條意粉都均勻掛上鹹辣惹味嘅明太子同和風醬汁,啖啖香濃。意粉更加入三文魚子同菇,前者有粒粒爆漿口感而且增添鮮味,後者可以平衡膩感。

油封雞腿伴野菜($248)
油封雞腿伴野菜($248)

餐廳招牌菜式之一,選用本地雞髀、先醃製12小時再風乾12小時,令醃料同雞肉嘅風味鎖住,再由廚師收到點單後即叫即焗。風乾過再焗嘅雞皮變得又薄又脆,而且食落充滿雞油香但又無肥膩感!雞髀肉就相當滑嫩多汁,完全唔韌。食到中間可以點少少黑醋汁,微酸醒胃。

紫薯比利時窩夫($138)
紫薯比利時窩夫($138)

窩夫加入紫薯製作,所以切開係紫色嘅!口感外脆內鬆軟,同時不失煙韌,有微微蛋香,唯一可惜嘅係紫薯香相比之下就唔太明顯。建議按喜好配搭楓糖漿,增加香氣。

Blueberry Mojito($78)
Blueberry Mojito($78)
Midori Sour Cocktail($68)
Midori Sour Cocktail($68)

開放式酒吧供應日本清酒、日本威士忌、紅白酒等,當中亦有經典及創意雞尾酒。例如Blueberry Mojito就以藍莓取代青檸,令清涼嘅Mojito少一份酸味多一份莓果甜香。Midori Sour Cocktail當中嘅Midori係日文綠色嘅意思,而呢杯綠色嘅調酒以伏特加同冧酒為基底,加入青蘋果利口酒及梳打水,酸甜平衡。

TRIPLE C
地址:中環域多利皇后街15-16號地下及1樓

文、相:Cathy.H

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能