中環精釀酒吧餐廳 小食+甜品啤酒入饌 麻辣乳鴿夠惹味

閒時放工、放假會同朋友搵地方飲返兩杯、放鬆下嘅香港人,中環最近有新場呀。由本地著名精釀啤酒廠Carbon Brews開設嘅同名酒吧,有28個tap頭供應新鮮精釀啤酒,主廚更曾喺米芝蓮餐廳做過,呢度嘅餐牌食物款式未必係最豪華,亦未必有好靚for打卡嘅擺盤,反而係簡單、樸實風格,好啱送酒。

炸魚仔加薯條係最推介嘅佐酒美食之一,師傅以加拿大薯仔製成手切薯條,薯肉飽滿,另外仲有鹹香可口嘅炸小銀魚。就咁食都feel到有少少辣,想再重口味啲可以點埋佢哋自家製發酵辣醬。

有飲開佢哋啲酒嘅話,一定會飲過Crazy Rich Lupulins,呢款啤酒本身帶有熱帶芒果同木瓜嘅香味,今次將呢款啤酒入饌製成Crazy Rich Beer Cheese添。混合3款芝士包括mozzarella、車打芝士等再加埋招牌啤酒製作,芝士味濃郁,面層烘至焦香,配搭烤全麥酸種麵包,好似nachos咁dip嚟食都幾有風味。

呢碟封門柳嘅精髓,應該喺啲醬度。話說,啲醬係由牛骨髓、小牛骨肉、波特酒、紅酒、紅蔥同埋各種香草製成,有淡淡煙燻味。封門柳嚼勁雖重,但肉香卻畀想像中輕咗啲。

重點推介要出場了!油炸乳鴿!平時通常喺中式酒樓食嘅乳鴿,酒吧都竟然有?仲要係重口味麻辣版!師傅先以煙燻鹽水醃製乳鴿,將之風乾後再油炸,外皮酥脆。醬汁則以鴨油、臘鴨、辣椒蒜醬同13種香料製成,辣得嚟仲帶有麻香,過癮架係。不過食多幾啖成個口都麻晒,除咗可以飲返杯清爽嘅精釀啤酒之外,仲可以食返啖跟配嘅布冧。呢個布冧都加過工架,撒咗啲紫蘇落去,酸酸咪咪咁中和返。

甜品方面,拖肥椰棗蛋糕(Sticky Date Pudding)介紹返。呢款甜品同樣都有加到酒落去整架,用咗黑啤。黑啤本身帶有咖啡香,製成焦糖醬後甜香中仲有啲烘焙香味。蛋糕口感濕潤,邊邊位有啲脆口,但都幾甜下。

主角來了。相信各位酒友對Carbon Brews呢個本地精釀啤酒品牌一定唔陌生,酒吧設有cold room以保存啤酒喺最佳嘅冷藏狀態。28個tap頭除咗各地唔同品牌同唔同類型嘅啤酒外,當然一定會供應返自己嘢啦。夏天來臨最啱就係飲清爽同果香嘢,粉紅色酒體嘅Sour Punch同金黃色嘅Crazy Rich 係唔錯嘅選擇。前者帶清新果酸,容易入口;後者嘅果香突出,而且苦度較同類型嘅啤酒為低。

Carbon Brews

地址: 中環雲咸街60號中央廣場地下1號舖

文:Kar

相、片:Wilfred Chui

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能