串椒3姊妹:繽FUN星網:被小惠篤爆賺少啲都要蒲 「蒲精」蘇民峰:唔蒲唔知身體好

梅小惠、曾華倩及江欣燕繼續於《串椒3姊妹》玩爆料。
梅小惠、曾華倩及江欣燕繼續於《串椒3姊妹》玩爆料。

由梅小惠、江欣燕及曾華倩主持的繽FUN星網節目《串椒3姊妹》集集有料爆,新一集堪輿學家蘇民峰大爆多年前與江欣燕「識於蒲時」,更自揭「喜愛夜蒲」一面,不但帶學生落酒吧學睇風水,更揚言「去蒲能醫百病」,全靠蒲吧令身體毛病不藥而愈,甚至有回春效果,絕對是「世界級蒲精」!

難得請來「玄學界男神」蘇民峰,「3姊妹」當然爭住睇相望贈言幾句,更一早準備好眼藥水及新鮮滾熱辣的杞子水為對方「補眼」,相當積極。原來3姊妹與蘇民峰甚有淵緣,當中與江欣燕更是一同落吧的「蒲友」,梅小惠則表示早在16年前曾訪問過對方,當時發現他疲態盡露,蘇民峰承認當年曾經患病,及後放慢生活節奏後竟自然康復:「嗰時開始每個月都放一個禮拜假,每日5點都停一個鐘去下午茶,做少咗嘢之後,真係不藥而愈。」梅小惠隨即暗寸:「即係寧願睇少啲相都唔肯蒲少啲?」蘇民峰大爆金句:「一定要蒲,蒲先係休息!」

酒吧授徒唔識老

講到10年前與華倩合作玄學節目《民峰學院》,蘇民峰自爆當時竟在酒吧「授課」:「嗰陣成班人上完堂成2點鐘,照去飲酒去蒲,我教佢哋點睇人生,蒲場好多嘢睇,人生百態都有,黐酒飲又有、溝緊有錢女都有。」他續指靠睇掌優勢結識到不少女士:「見到靚女,梗係詐詐諦諦同佢傾多兩句啦!」眾女即笑指他是「蒲精」,又指他愛玩、幽默的性格打破了一貫風水師傅的形象,他表示蒲得多的確更加快樂:「蒲嘅人係唔會老,有時啲人冇蒲幾年,再出番嚟個樣都唔同晒,但一路蒲開嘅真係唔老,可能因為心情輕鬆啲,個樣就Keep到。」

下一集有同樣牙尖嘴利的主持人錢嘉樂,想知3姊妹能否招架得住?記住收看8月6日在繽FUN星網播出的《串椒3姊妹》。

蘇民峰與曾華倩曾合作玄學節目《民峰學院》,今次碰頭,齊齊重溫當年「蒲史」。
蘇民峰與曾華倩曾合作玄學節目《民峰學院》,今次碰頭,齊齊重溫當年「蒲史」。
梅小惠獲讚做事夠幹勁。
梅小惠獲讚做事夠幹勁。
3姊妹着到紅噹噹迎接蘇民峰,他當然要贈番兩句。
3姊妹着到紅噹噹迎接蘇民峰,他當然要贈番兩句。