九龍區開飯 自家創作點心/甜品/特飲見新意

·4 分鐘文章

間間西餐都係鋸扒、間間中菜點心都係蝦餃燒賣?又唔一定嘅,有啲餐廳會喺傳統菜式中加入自家創作,進行變奏,甚至係嘗試你完全冇諗過嘅配搭口味,撞下撞下又work out到啲驚喜出嚟。

Flames (黃埔)

隨住鐵路嘅發展,而家愈嚟愈多人入黃埔搵食。呢個喺九龍區嚟講相對安靜嘅小區,暗藏咗多間美食餐店。呢間西餐廳以黑白灰為主色調,簡約裝修適合朋友聚會,坐低就有種輕鬆自在嘅感覺。餐廳主打炭燒雞,更有多款自家製甜品。

葡式香辣春雞

深受客人歡迎嘅葡式香辣春雞,雞皮燒至脆卜卜,入口雞肉依然嫩滑,加埋自家製嘅Peri Peri葡式辣醬,層次自然更豐富。外脆內嫩係有原因嘅,師傅特意選用900克嘅春雞製作,大細剛好係最易令醃料入味嘅size。單係醃肉,已經用上紅椒粉、辣椒粉、薑、蒜、檸檬汁同新鮮蕃茄蓉等多種食材,醃製24個鐘後再以慢火蒸焗至半熟,最後以大火燒脆雞皮,知佢咩料啦!

葡式香辣春雞
葡式香辣春雞

蟹肉巴馬臣芝士脆脆蕃茄忌廉汁通粉

芝士控必叫嘅蟹肉巴馬臣芝士脆脆蕃茄忌廉汁通粉,芝士鹹香中滲出啖啖蟹肉鮮甜。師傅解釋選用通粉係因為通粉容易包住醬汁,而且將蟹肉、洋蔥、蒜蓉香草同蕃茄忌廉汁一齊烹調,可以令蟹肉同蕃茄忌廉汁融為一體,口感夠晒rich。

蟹肉巴馬臣芝士脆脆蕃茄忌廉汁通粉
蟹肉巴馬臣芝士脆脆蕃茄忌廉汁通粉

燒香脆乳豬配西班牙飯西蘭花苗

同樣都係醃製24個鐘嘅燒香脆乳豬,以慢火蒸熟後再以猛火燒脆豬皮,配埋番茄、百里香,同埋上湯煮嘅西班牙飯,份量十足,而且重係原隻上枱,食得到油脂香亦完全保留到肉汁,肉質亦相當嫩滑,油香重滲埋落啲飯度𠻹。

燒香脆乳豬配西班牙飯西蘭花苗
燒香脆乳豬配西班牙飯西蘭花苗

CAKE SHAKE

既係飲品又係甜品嘅Cake Shake,係餐廳嘅重點推介,將自家製嘅蛋糕變成奶昔,大大杯,插滿各式各樣嘅朱古力餅同零食,重有大量棉花糖鋪面,完全係愈邪惡愈興奮嘅朋友,打卡一流。

點心到 MIX·大排檔 (旺角)  

室內有冷氣嘅大排檔,唔止有打冷、小炒嘅菜式,重有即叫即蒸嘅點心,部分更係自創嘅𠻹。菜式製作頗有新意,係有別於傳統嘅廣東菜餐廳。老闆同師傅都係由澳洲回流,集合同吸收西式嘅烹調技巧,融入中菜,的確帶出唔少驚喜。

秋葵野菌扒豆腐

幾乎每枱都會點嘅秋葵野菌扒豆腐,製作上都要唔少功夫。下層係將雞蛋加入豆漿蒸熟,靜待凝固;上層淡綠色嘅則以菠菜打蓉,再加落豆漿度蒸完再炸而成。豆腐外脆內滑,配埋野菌同秋葵醬汁,味道幾有驚喜。

秋葵野菌扒豆腐
秋葵野菌扒豆腐

英式芥末牛柳粒

呢道菜式嘅靈感嚟自師傅以前喺澳洲生活嘅經驗,英式芥末牛柳粒亦係選取澳洲牛脊條製作,肉質腍啲滑啲,配搭自家調製嘅芥末汁,微辣中帶微甜,送飯一流。

英式芥末牛柳粒
英式芥末牛柳粒

避風塘瀨尿蝦

師傅特別選用班馬瀨尿蝦,因為肉夠多,而且好多時都會有膏。而蒜絕對係避風塘菜式嘅重點,呢度嘅蒜蓉每日都會新鮮炸起,吹乾備用,每碟都會加入勁量嘅蒜。瀨尿蝦肉新鮮爽彈,蒜香鹹辣兼備。好啱配啤酒。

避風塘瀨尿蝦
避風塘瀨尿蝦

炭燒山楂鴨絲包

小炒以外,呢度亦有多款自創點心供應。好似炭燒山楂鴨絲包,外層加入竹炭粉製作,內餡有山楂同煙燻鴨絲,陣陣煙燻香味過後,就滲出絲絲山楂酸香,層次多變。師傅更解釋呢個咁創新嘅配搭,係因為考慮到包點通常易食滯,所以就加入山楂幫手開胃啦。

炭燒山楂鴨絲包
炭燒山楂鴨絲包
炭燒山楂鴨絲包
炭燒山楂鴨絲包

榴槤雪媚娘

榴槤迷千祈唔好錯過呢個甜品,個名好優雅嘅榴槤雪媚娘,其實即係榴槤糯米糍。選用泰國D24榴槤蓉製作,外皮薄身煙韌,內餡口感creamy,接近入口即溶,榴槤香味重有悠長嘅餘韻呢~

榴槤雪媚娘
榴槤雪媚娘
我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能