九龍城新開日系精品咖啡店 嘆湯咖喱定食+特調冰搖咖啡

·4 分鐘文章

屯馬開通真的很興奮~其中一個原因就係大家去九龍城食嘢方便咗!介紹返呢間新店畀各位咖啡迷同追求健康嘅朋友,皆因佢哋自家烘焙咖啡有水準之餘,亦有唔少主食同輕食都係健康素食。遲啲仲會供應埋各款Cocktail,朝啡晚酒感覺夠晒Chill。

九龍城新開日系精品咖啡店 嘆湯咖喱定食+特調冰搖咖啡
九龍城新開日系精品咖啡店 嘆湯咖喱定食+特調冰搖咖啡

Blossom新店位於九龍城南角道,地方更大加上高樓底頗有空間感,而原橡木長吧枱、印上Logo嘅水泥牆同天花板上嘅橙樹等別具一格。餐廳亦同beanto.hk合作推出健康素食Menu,比坊間素食更輕盈同時更有營養。

鳳梨金畢文芝士酸種包
鳳梨金畢文芝士酸種包

鳳梨金畢文芝士酸種包($88,9:30-11:30供應)

早餐時段以酸種包多士為主,最推介呢款鳳梨金畢文芝士口味,保留部分果肉嘅鳳梨果醬,配搭用火槍烤至半融Creamy嘅金畢文芝士,味道酸酸甜甜咁同時又有芝士嘅奶香,估唔到咁夾!加上流心水波蛋同荷蘭醬增加濕潤度,滿足得嚟又唔太膩。酸種包就採用本地Alive Food出品,濕度適中令麵包煙韌得嚟,邊位烘完都唔會太乾或者𠝹口。

仲會附上鮮果、沙律、奇亞籽布丁,奇亞籽係有豐富膳食纖維、Omega-3等嘅Superfood。Lunch Time大家就可以試下黑松露椰菜花飯配椒鹽天貝($118,11:30-17:30供應),天貝係印尼嘅傳統發酵食品,含有豐富嘅蛋白質而且低脂,想跑素或者減醣就啱晒。

波甚湯咖喱飯定食
波甚湯咖喱飯定食

波甚湯咖喱飯定食($128,11:30-17:30供應)

午市另一推介係坊間少見嘅湯咖喱,經過研究同改良食譜,保留咗日式湯咖喱濃稠度適中、當湯飲都唔會太鹹嘅特色,同時加入香料、增添香味同辣味更貼近港人口味。配料就有六種時令野菜、鷹嘴豆、薯仔同紅蘿蔔。

拍攝當日就有蓮藕、南瓜、雞髀菇、波椒等,蓮藕炸過口感特別爽脆,南瓜軟綿香甜。咖喱口感就有啲似西式濃湯,味道非常豐富,皆因咖喱當中有可可粉同餐廳嘅自家烘焙嘅House Blend咖啡,鹹鹹甜甜當中有多重香氣,最後帶少少辣。

波甚凍鮑魚配柚子豉油
波甚凍鮑魚配柚子豉油

波甚凍鮑魚配柚子豉油($238,15:00後供應)

之後夜晚會供應Cocktail,所以亦有供應送酒小食。呢個凍盤就選用五頭南非鮑魚,先以慢火蒸熟,一熟就立刻清除內臟同冰鎮、再雪過夜先有彈牙爽口嘅口感。醬汁就用日本柚子豉油再加檸檬汁調配而成,有柑橘嘅清香,微酸可以帶起鮑魚嘅鮮甜原味。

提拉米蘇
提拉米蘇

提拉米蘇($68)

提拉米蘇係香港大學店嘅招牌甜品,用咗House Blend Espresso、Cold Brew、Dark Rum同咖啡酒去浸手指餅,配搭Mascarpone Cheese、雞蛋等。酒同咖啡香味平衡,加上可可粉嘅微甜,味道豐富。口感亦有層次,會食到芝士嘅柔滑、上層手指餅嘅鬆脆同下層手指餅嘅濕潤。

虹吸咖啡
虹吸咖啡
虹吸咖啡
虹吸咖啡

虹吸咖啡($75起)

手沖同虹吸咖啡都有多款單品咖啡豆選擇,採訪呢日就試咗虹吸日曬衣索比亞豆,有提子、士多啤梨等明亮嘅酸甜味,Aftertaste就以莓果酸味為主。口感厚實圓潤,味道層次亦夠分明。

特調冰搖咖啡
特調冰搖咖啡

特調冰搖咖啡($60)

夏天想飲杯凍啡,可以試試呢杯特調冰搖咖啡,以House Blend Espresso同Cold Brew為基底,加入沖繩青檸汁、柑橘檸檬汁同冰再用Shaker搖勻。上面仲會有一層泡沫,咖啡飲落亦更厚滑。沖繩青檸汁唔單止可以增加香氣,同時亦含豐富有助抗氧化嘅川陳皮素。一杯有齊酸、甜、苦味,好似人生咁,所以英文名就係Viva la Vida「活在當下」。

Gin Tonic
Gin Tonic

Gin Tonic(價錢待定)

餐廳計劃之後會供應多款Cocktail,包括一系列咖啡Cocktail同經典Cocktail。包括呢杯Gin Tonic,用手切嘅長條冰可以減慢融化速度,加上冰係用純水製作,減少影響酒體同味道。連裡面嘅青檸亦特別挖走帶澀味嘅果芯,口感清爽而且唔會太嗆,相當易入口。

Blossom
Blossom

Blossom
地址:九龍城南角道45號地舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能