【亂世買金】實物黃金/紙黃金/黃金ETF入門一覽

黃金可以保值，社會唔穩定，買金亦被視為投資避險嘅熱門方法。買金除咗可以去金舖，仲有咩途徑？除咗買實物黃金，仲有咩方法可以參與同黃金有關嘅投資？如果想跟隨黃金價格嚟做投資基礎，減低風險，可以嘗試購買實金、紙黃金同黃金ETF 三種方法。購買實物黃金方法直接，風險都較少，本文亦介紹買實金嘅渠道。

實物黃金 最直接投資方法

黃金被視為穩當嘅投資工具，購買實物黃金就係最直接嘅方法，一般可以去銀行或金舖購買，前者所定嘅價格同買賣差價都會比較好。購買實金以金條、金粒、金幣較大路，以保值為大前提嘅話，適宜購買金條，因為可以免卻首飾類黃金所牽涉嘅手工費，唔會增加買金成本。另外，用嚟保值最好買同一款黃金例如金條或金粒，方便計算。不過，由於現時銀行保險箱供應買少見少，買實金需要考慮貯存問題，可以考慮買個夾萬喺屋企用嚟放金。

現時中國銀行、上海商業銀行、恒生銀行、永亨銀行、招商永隆銀行、周大福、周生生、謝瑞麟等都有提供實金買賣服務；如果喺銀行購買九九九九金或九九金，大部分都以每両嚟計算，入場費會較高。另外，唔係每間銀行都有黃金存貨，購買前可先致電查詢，亦都需要問清楚銀會唔會回購其他銀行或金舖所出品嘅黃金產品，確保日後有途徑「放貨」。

----------------------

紙黃金 清晰記錄黃金存款

紙黃金（又稱黃金存摺）係持牌銀行推出嘅投資產品之一，投資者只要去銀行開設相關賑戶，就可以進行黃金買賣。設立黃金存摺，喺買入賣出嘅過程中，都唔會有實物黃金交收，黃金存摺只記錄咗黃金嘅存款，而當中亦都唔會有利息收入，賺蝕就視乎金價嘅升跌。紙黃金勝在入場費較低（0.1両都有交易），亦避免咗實金嘅存放問題。

現時唔少銀行都有提供紙黃金服務，例如匯豐銀行、恒生銀行、CITIBANK、工銀亞洲、招商永隆銀行等，而交易種類分別有香港99金、9999金及倫敦黃金等，銀行網頁都有列出開戶須知，事前可以先作了解。

----------------------

黃金ETF 投資方法具彈性

購買跟隨黃金價格升跌嘅ETF（黃金交易所買賣基金）係另一種參與黃金市場嘅投資方法。黃金ETF即是基金，走勢大致同金價升跌同步，本港有3隻掛牌嘅ETF，分別係SPDR金ETF（2840）、價值黃金（3081）同恒生人幣金ETF（83168）。黃金ETF一般有實金支持，即當有投資者買入ETF，發行機構就會買入相應價值嘅實物黃金作為後盾。

黃金ETF入場費較低；買賣方式同股票一樣，可以作市價、限價同止蝕盤買賣等指示。其中SPDR金ETF除咗喺香港上市，亦有喺美國及日本上市，較為國際化，適合唔同需要嘅投資者。

----------------------

即睇購買實物黃金熱點

中國銀行

點樣買：
‧可以去指定分行購買
‧透過銀行網頁或分行，查詢貴金屬產品嘅最新報價
‧產品除咗金條、金幣，仲有銀條同白金等
*於各分行及銀行網頁所報之所有價格僅供參考
*銀行保留隨時更改、暫停或取消上述產品、服務及修訂有關條款與細則的酌情權而毋須事先通知

實金產品包括：
‧99實金
‧9999實金
‧楓葉金幣
‧熊貓金幣
‧倫敦銀
‧蘇黎世白金等

----------------------

恒生銀行

點樣買：
‧可以去指定分行買賣，購買前先致電查詢存貨情況
‧透過銀行網頁或分行，查詢貴金屬產品嘅最新報價

實金產品包括：
‧9999金條（一金衡両）
‧99金條 （一金衡両）
‧財神金牌（20克）
‧財神金牌（10克）
‧橢圓形財神金牌（5克）等

----------------------

上海商業銀行

點樣買：
‧備有唔同種類金條同金幣選擇
‧可以喺全港分行進行買賣

實金產品包括：
‧5両裝99金條（純度99%）
‧1両裝千足黃金（純度99.99%）
‧5両裝千足金條（交收版及精裝版；純度99.99%；需付額外費用）
‧加拿大楓葉金幣（備有1盎司、0.5盎司、0.25盎司及0.1盎司裝；純度99.99%）
‧澳洲鴻運金幣（備有1盎司、0.5盎司、0.25盎司、0.1盎司及0.05盎司裝；純度99.99%）等

*於銀行回購「精裝版」5両裝9999「千足黃金」金條，須出示本行之買賣單據正本，以及「金銀業貿易場」發出之「質量鑒證書」正本
*銀行不會回購任何非經本行代售的「精裝版」5両裝9999「千足黃金」金條
*5両裝「千足黃金」（精裝版）的回購價格，不包括之前支付的額外費用
*買賣分行——黃金金條：全線分行；金幣：中區營業部、總統分行、旺角分行、尖沙咀分行、屯門分行及大埔分行

----------------------

周大福

點樣買：
可以於網上預約購買金條（45両）、金粒（42両）。顧客需要先填好網上表格，喺三個工作天內去預約咗嘅分行購買，再喺三個工作天後或指定日子去門市取貨

實金產品包括：
‧金條（45両）
‧金粒（42両）等

*只接受現金
*於分行確認購買金粒／金條時，須於分行即時確認金價，不能以市價訂貨，及必需先全數付款

----------------------

周生生

點樣買：
可到各分店直接購買

實金產品包括：
‧足金飾品
‧足金金條等

**部份資料為銀行提供**
**以上資料僅作參考用途**
**資料更新日期：2020年6月2日**