互相迷戀攬住瞓！MC孖李元元合作 收風馴服「小狂迷」

歌手張天賦（MC）人氣高企，唱得又靚仔的他粉絲量有增無減，連人氣爆燈、李璨琛的4歲網紅女兒李元元（Lucy）亦被他迷倒！原來MC同樣是Lucy的粉絲，更自爆雙方有機會合作！

張天賦與馮允謙（Jay）前晚為《CHILL CLUB Keep Going》演唱會綵排，MC表示因疫情關係已很久沒有和觀眾接觸，所以未開騷先興奮。談到Lucy相當迷戀他，他笑說：「我知呀！其實佢每條片我都有睇，仲有留言添！佢好可愛呀，嚟緊應該會合作。（有信心搞得掂？）我好鍾意小朋友，應該會好有耐性，佢又咁鍾意我，應該會聽我話啩？哈哈。（買定小禮物？）事前會打聽吓佢鍾意食乜！」

化身白雪公主「中劇毒」

Lucy一直是網民的開心果，社交平台吸納近38萬粉絲，近日她開始變得「少女」，貪靚之餘更情迷MC。她早前獲贈MC的紙牌公仔，隨即要求搬入房中「陪瞓」，相當搞笑。她又被媽媽「出賣」躲在家中一角化妝的短片，片中用小手拿起眼影狂掃，之後更換上白雪公主裝，配上深藍色眼影大擺甫士拍照，被母親取笑她似「身中劇毒」！

另外，Jay透露近期工作較忙，有時間就留家休息，但亦爭取時間健身，希望保持身體健康。提到剛為張敬軒演唱會任嘉賓，他表示同樣想邀請對方做演唱會嘉賓，但擔心軒仔太忙而推卻，令他「好Hurt」。