五月天演唱會｜啟德包廂現「幫李嘉誠點歌」巨型橫額 阿信請食檸檬全場爆笑：沒有選你

五月天演唱會昨晚完成尾場演出，繼頭場有香港首富李嘉誠親臨睇show，昨晚「誠哥」又隔空現身，喺VIP包廂區有「想幫李嘉誠點歌」巨型橫額，引嚟全場哄動。不過五月天就請佢哋食檸檬，響首富個朵都冇特權，阿信直言「但是今天我們石頭沒有選你」，連喺台上嘅石頭同怪獸都忍唔住狂笑，石頭就解釋點歌環節係俾樂迷個人嘅點歌福利，佢接住揀咗高舉「我哋喺香港人」橫額嘅樂迷，觀眾都報以熱烈掌聲。

台灣樂隊五月天赴每年「五月之約」來港開演唱會，首次踏足啟德場館。昨晚為四場表演嘅最後一夜，頭場「重量級嘉賓」係香港首富李嘉誠，自2018年退休後，「誠哥」越嚟越少出席公開場合，佢當晚精神奕奕坐喺包廂睇show，俾KOL 千頌C野生捕獲，成為今次五月天演唱會一大話題。

尾場李嘉誠冇再親自現身，不過喺點歌環節，同一包廂位置附近就出現「想幫李嘉誠點歌」巨型橫額，吸引五月天注意，台上大型屏幕都影住呢個橫額，不過「誠哥」都唔等於有特權㗎，阿信話「但是今天我們石頭沒有選你」，鏡頭影住「只因字夠大」，搞到台上嘅石頭同全場觀眾狂笑。

石頭接住揀咗高舉「我哋喺香港人唔該揀我」嘅樂迷，佢表示想點《終於結束的起點》，而佢嘅橫額仲有廣東話拼音，唔揀佢都唔得啦！雖然「誠哥」冇成功點歌，不過呢個環節令大家都好歡樂。

李嘉誠自2018年辭去長和（001）同長實（113）董事局主席兼執行董事職位，過住低調嘅退休生活。不過佢仍然都係香港首富，根據福布斯嘅2025年香港五十大富豪排行榜，長和系創辦人李嘉誠以373億美元（約2,909.4億港元）身家，繼續蟬聯榜首。

數數吓李嘉誠退休7年，佢好少出席公開場合亮相，亦唔再以集團主席身份出席股東大會，只係間中有KOL post 吓李嘉誠戴Apple watch 嘅相、有人見到佢出現慈山寺，同埋談論吓長江生命科技捐贈醫療器材俾醫院嘅消息。今年長和公布賣港口嘅計劃，就令李嘉誠嘅名字一度登上Google 熱門搜尋。