人氣雞翼店旺角再開新店 90分鐘雞翼放題 最平$128

·3 分鐘文章

Come on!雞翼控「一齊叫雞」喇!呢間人氣雞翼專門店終於喺九龍區開分店喇,選址交通便利嘅旺角,新店開張除咗有限定新口味之外,仲乘勢推出90分鐘雞翼放題,最多可以有成18種口味選擇!

 90分鐘雞翼放題,最多可以有成18種口味選擇!
90分鐘雞翼放題,最多可以有成18種口味選擇!

呢度嘅雞翼,都係用獨家配方嘅醬料醃製,真空、慢煮處理完後,收到落單再即叫即炸,所以脆口得嚟又保留到內裡嘅肉汁。平時見到佢哋嘅menu,款款味都好吸引好想試,今次呢個放題終於有機會逐隻試喇!90分鐘嘅放題,除咗星期三之外,日日都有,不過唔同時段就唔同價錢,最平$128就可以食到(立即按此訂座享優惠)。

花雕醉雞
花雕醉雞

必須要介紹嘅係旺角店新出限定口味——花雕醉雞,師傅用上花雕酒、玫瑰露等幾款酒去製作,難怪離遠已經聞到陣陣酒香。仲有少少花椒喺面,醉香得嚟仲有微微辣感,層次豐富。

雞翼雞煲
雞翼雞煲

另外17款味道中,最特別嘅就係雞翼雞煲啦,混合咗香港人最鍾意嘅元素,有gimmick得嚟啲醬汁又麻又香,愈食會愈想食。

印度唐杜里烤雞味、日本蜂蜜芥辣、死神醬、日本吉列咖哩味、加勒比海香辣雞
印度唐杜里烤雞味、日本蜂蜜芥辣、死神醬、日本吉列咖哩味、加勒比海香辣雞

食得辛辣嘅朋友仔,Wingman水牛城醬味都幾推介,呢個係自家調配嘅水牛城醬,加埋芝士喺面,仲有啲辣椒,係幾惹味。但如果講到挑機,就梗係揀打大佬——死神醬味啦。傳說中嘅特級辣指天椒,掂一掂到啲醬已經衝出辣勁,莫講話食晒成隻,絕對刺激。

巴馬臣芝士蒜蓉味、泰式甜辣醬、田園風味、黑芝麻海鮮蜂蜜、Espresso、水牛城醬
巴馬臣芝士蒜蓉味、泰式甜辣醬、田園風味、黑芝麻海鮮蜂蜜、Espresso、水牛城醬

唔食得辣嘅都仲有好多選擇,田園風味係sour cream同洋蔥,完全係薯片味嚟,哈哈,同隻雞翼唔算話十分之夾但係呢個experience係幾有趣。如果唔小心食咗啲辣嘅雞翼,黑椒檸檬、黑芝麻海鮮蜂蜜嘅酸或甜都可以中和返呢。

黑椒檸檬、新加坡辣蟹味、紐奧良香粉、自家製鹹蛋黃、蒙古燒烤味、Wingman水牛城醬
黑椒檸檬、新加坡辣蟹味、紐奧良香粉、自家製鹹蛋黃、蒙古燒烤味、Wingman水牛城醬

其餘口味仲有新加坡辣蟹味、紐奧良香粉、自家製鹹蛋黃、蒙古燒烤味、巴馬臣芝士蒜蓉味、泰式甜辣醬、咖啡香味、水牛城醬、印度唐杜里烤雞味、日本吉列咖哩味同埋加勒比海香辣雞,各有特色。

 南瓜燴意大利飯
南瓜燴意大利飯

呢度唔係淨得雞翼嘅,另外都仲有啲小食同意大利飯,其中南瓜燴意大利飯就係旺角新店嘅新品,得呢間店先食到,以南瓜盛住creamy香口嘅意大利飯,食完飯仲可以嗶埋啲南瓜肉食添。

 Wingman
Wingman

Wingman
地址:旺角彌敦道594-596號旺角新城17樓