人氣韓劇《Penthouse》今明兩集以19禁形式播出 結局被韓國網民率先爆？

由李智雅、金素妍及柳真（Eugene）主演嘅韓國人氣劇集《Penthouse》，雖然冇超大卡士陣容，不過自開播以來收視節節上升，第17集刷新收視紀錄，獲得全國24.0%收視；首爾圈更錄得25.8%收視，證明劇情真係令人上晒癮！可惜話咁快1月5日就會播出第一季結局，一班劇迷就即刻喺韓國討論區熱烈討論究竟結局會係點！

早前播出嘅16集就終於揭曉咗Eugene就係殺死李智雅女兒趙秀敏嘅真兇。有眼利網民就指出其實劇集好早就已經暗示咗Eugene就係真兇！當佢同囡囡搬咗入趙秀敏死後嘅寓所時，趙秀敏隻狗就已經對住佢係咁吠，咬完佢之後仲死埋，證明狗狗死前好想為主人報仇。

討論區就有文章指出咗部份結局劇情，例如：
－ 嚴基俊前妻所生嘅兒子金永大同Eugene女兒金賢秀一段「羅密歐與茱麗葉」般嘅戀情，一向都被劇迷追捧。不過有消息話由於「黑化」咗嘅Eugene勾引嚴基俊成功，仲同佢再婚，搞到囡囡冇得同金永大相戀，最後走上絕路。
－ 由起初善良到後來越來越心狠手辣嘅Eugene又點呢？文章作者就話劇中有一幕有暗示就係Eugene彈鋼琴及金賢秀唱歌時，畫面突然變慢咗，好似回憶嘅場面咁，當時Eugene仲話嗰日囡囡嘅歌會係聽過最好嘅。意思就係Eugene一向都係為咗囡囡而生存，甚至為咗佢殺埋人，所以最後囡囡嘅死亡就係最大嘅懲罰。

不過究竟劇中另外兩大奸角嚴基俊同金素妍結局又會係點呢？相信亦會係結局嘅亮點之一！SBS日前就宣佈今晚及聽日播出嘅第18同第19集將會以19禁嘅形式播出，唔知最後又會有啲咩突破性嘅發展呢？

除此之外，官方已經公佈第二季及第三季嘅最新消息，指第二及三季分別會製作成12集，第二季嘅劇本已經完成，拍攝亦已經進行中，計劃於明年二月出街。有追開《Penthouse》嘅朋友，到時唔好錯過啦！

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！