今時今日咁 服務

【星島日報報道】從前，香港電台有位出色領導，經常有句口頭襌斥責高層下屬：「我唔想聽點解！你負責範圍，你搞掂佢，不容出錯，請向公眾交代！」冇人夠膽駁嘴，因個個自己知道理虧也。 究竟，今時今日，特區政府內的司長局長處長，以至，各大公共服務機構的總裁，仍有冇呢個氣度、呢種責任心……甚至羞恥之心呢？ 世界，應該是進步的，消費者及市民，絕對有權如此要求。凡事打倒褪，幾大唔接受。 舉例，小弟早前公開批評機管局服務，尤其行李輸送處理，效率大不如前，令人費解又憤怒。記得赤 角機場剛落成，最多人讚賞為事事快速精準。一般行李輸送，乘客下機後，半小時內必定搞掂，輕輕鬆鬆、快快樂樂離開。 今天又如何？相信，並非只得小弟特別黑仔。上次回港，搞 超過一小時，投訴後，機管局當然有這樣那樣解釋。好 ，上周四又 ，下午坐AE1841由台中返港，非繁忙時間。落機後，十分鐘已到輸送帶等。第一批行李飛快見面，十五分鐘吐出。豈料，令人嬲爆，因第一批吐完，停低，死寂，半個鐘頭再冇 出！旁邊一班草根江湖客當然媽媽連聲，但又唔知去邊度問、邊度投訴。終於，三十五分鐘後再緩緩吐出其他行李。我的兩件行李，足等 五十分鐘，如此效率，機管局CEO林天福能接受嗎？ 一如港鐵，行政總裁梁國權豈能接受鐵路服務跪低，乘客被困悶熱車廂幾十分鐘到幾小時，成為常態呢？有冇諗過自己走去試試呢種無奈又憤怒的處境呢？做CEO豈可冇同理心呀？ 請勿用「機器老化」做藉口。若咁都得，中電及港燈又如何？能否將大停電變成「常規化」呀？分分鐘死人 ，知冇？ 機管局及港鐵CEO，收得成千萬元年薪，唔該你兩位Deliver好冇？ 阿碌開咪 曾智華 副刊