今晚好犀利︳陳豪蕭正楠各自攜眷現身內地綜藝 產後黃翠如狀態更勝陳茵媺？

早排幾位前TVB男藝人吳卓羲、郭晉安、歐陽震華、王浩信埋高鈞賢，一齊參與內地網上直播節目《今晚好犀利》，其中一個環節係5位男星跳舞，仲係跳hit過好一陣子嘅《晚安大小姐》，由於各人舞步唔齊甚至根本唔知跳乜，成個畫面都有濃濃嘅尷尬感。

早前另一集《今晚好犀利》請到陳豪、陳茵媺、蕭正楠、黃翠如2對娛圈夫妻做嘉賓，同場仲有香港歌手涂毓麟同佢嘅內地藝人女友孫樂言。節目內容大致都係「大電視」、問答環節大爆相處秘聞、唱歌等等。上次嘅「老尷」跳舞環節今次冇出現，不過陳豪喺節目中嘅自我介紹話「我係陳豪，我負責搵錢養家」，陳茵媺就話「我負責搞到成個家笑哈哈」，押晒韻，80年代《蝦仔爹地》咁喎。而且節目畫面疑似加晒濾鏡，令陳豪雙眼睇落唔多自然。有網民認為產後無耐嘅黃翠如，喺節目中嘅風采似乎更勝陳茵媺，甚至指Aimee有婦女味！

《今晚好犀利》係TVB同內地平台抖音合作嘅直播節目，由林曉峰、吳卓羲擔任主持，每集長達三四個鐘，但往往請到TVB一線藝人做嘉賓，官方介紹稱節目為「主打大灣區文化的直播互動秀」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！