令人又愛又恨!于淼憑《多功能老婆》飾演最強小三上位

《多功能老婆》截圖
《多功能老婆》截圖

台慶劇《多功能老婆》喺首播嘅時候,已經有「進擊的小三」Joey(陳庭欣飾),佢喺溫泉赤裸裸咁挑釁劍雄(黃浩然飾)老婆藍飛(楊千嬅飾),呢一幕喺網上成為熱話,唔少人已經大讚佢演得入型入格。正當大家都好戥藍飛唔抵嘅時候,其實「最強小三」先至真正出現呀!

上星期劇情就講到劍雄離家出走,而藍飛同囝囝佳佳就等佢返屋企。喺呢個時候,浩田(周柏豪飾)將藍飛掛念老公嘅故事製作成音樂片段,片段更喺網絡瘋傳。黃浩然見到之後就約藍飛見面,不過霸氣女總裁顏成功(于淼飾)從中作梗,為咗令藍飛可以同劍雄離婚,不可一世嘅佢竟然開咗一張$9,999萬嘅支票叫佢離開劍雄。事後顏成功返到酒店,佢仲喺劍雄面前扮可憐扮委屈。最終劍雄放棄香港所有嘢,選擇同顏成功喺埋一齊。唔少網民睇完之後,除咗為藍飛感到不忿、覺得個小三乞人憎同睇到眼火爆之外,大家都讚于淼成功演活呢個「最強小三」角色、又靚又有演技、同埋廣東話進步咗唔少。

黃浩然&于淼
黃浩然&于淼

現年31歲嘅于淼(Maggie),喺2012年代表大連參加《國際中華小姐競選》落選後加入無綫,之後就被安排喺娛樂新聞台擔任國語主播,因為佢個樣有少少似范冰冰同埋佢住喺將軍澳,所以有「將軍澳范冰冰」嘅稱號。近年佢開始為劇集拍攝,例如《鬼同你OT》、《來自喵喵星的妳》、《不懂撒嬌的女人》及《逆緣》等等。雖然佢唔係拍咗好多套劇,不過都有角色令觀眾留下深刻印象,好似有《不懂撒嬌的女人》嘅忘年戀及《逆緣》背叛老公嘅內地妻,佢更被封為「御用阿伯殺手」。今次喺《多功能老婆》挑戰小三角色,真係令大家對佢又愛又恨呀!

喺初初嚟香港嘅時候,其實佢一句廣東話都唔識,仲曾經試過被人以「有色眼鏡」對待。之後,佢就靠做義工、咬木塞讀報紙、煲港劇同睇新聞等等嘅方法,務求要學好廣東話。

于淼仲有兩套劇集未出街㗎,分別係《大醬園》及《愛美麗狂想曲》,鍾意佢嘅朋友記得留意啦!