任暟晴出道作《Breath Away》首曝光 Eric Kwok陳奐仁表示一定會紅 網民激讚：有種魔力吸引住

任暟晴（Jasmine）贏得《聲夢傳奇2》冠軍，除咗10萬元獎金更榮獲總監Eric Kwok郭偉亮及Hanjin陳奐仁為佢度身打造出道作品，而當時奪冠後6日即為處女作錄歌，比起上屆冠軍炎明熹（Gigi）更加快。日前呢位「傳奇新星」Jasmine於《聲夢傳奇2海外踢館賽》中以歌曲《是但求其愛》對戰馬來西亞冠軍Xair，仲首度公開獻唱出道作《Breath Away》，Eric Kwok和陳奐仁均極力大推。

《Breath Away》由Eric Kwok和陳奐仁共同作曲和編曲監製及林若寧填詞，Eric Kwok透露呢首歌製作初衷：「佢喺比賽唱過好多好大嘅情歌，所以我哋兩個想一首好甜蜜，返到佢16歲嘅世界。」及後，又對Jasmine嘅演繹讚口不絕，表示一聽就想繼續聽落去：「你嘅聲線同表情係好容易觸動到人，一千個歌手得十個係咁嘅啫，所以呢個特質唔係普通嘢，而係好犀利嘅。」而陳奐仁就寄語：「呢首歌一定會好紅」。睇嚟兩位總監都對Jasmine出道作相當有信心。

TVB隨後亦於聲夢傳奇官方YouTube頻道上載Jasmine於海外踢館賽中演繹《Breath Away》嘅影片，同樣獲網民大讚有水準：「Jasmine細膩柔情的演繹，清新脫俗，充滿少女情懷」、「好易入耳，冇太複雜的編曲，反而突顯她聲音的純粹及甜美」、「唔係k歌果類，但Jasmine有少少磁性既聲音好配合首歌，絕對係好有水準既作品」、「呢首歌真係好展現到Jasmine把靚聲，亦好配合她的年紀，她好像輕輕訴說甜蜜愛戀的感覺。好清新的感覺。」、「新歌首播第一次聽竟然有種魔力吸引住一齊唱」、「呢首歌神奇的地方係一次比一次好聽，一次比一次有層次」等等。而Jasmine參賽以來，一直被指「透氣聲大到似吸塵機」，不過於比賽尾聲已被評審大讚有好大改善，有網民就話覺得Eric Kwok及陳奐仁將Jasmine嘅唞氣聲專登加入首歌度更有特色：「真係神來之筆」、「Jasmine氣聲好正，任暟晴的味道。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！