任達華離家半年 掃貨氹妻女

東方日報
·1 分鐘文章
任達華逛名店主攻女裝,擺明係要送給太太和女兒。
任達華逛名店主攻女裝,擺明係要送給太太和女兒。

影帝任達華早前留在內地工作超過半年,期間更因拍戲「變身」阿伯,結果被指「未老先衰」,日前他於社交網留言「提早體驗了80歲的人生」。

日前他終於停工返港過年,完成隔離即換上戰衣,四出買禮物給妻女「慶團圓」。當日下午,戴帽及穿皮褸的他單拖現身中環一商場,先到地面名店兜圈揀心頭好,期間不停揭新裝介紹冊子,又與店員傾唔停攞意見,最後扑槌花5位數埋單。未幾他乘電梯到二樓,一支箭走到朱古力店外排隊,期間不忘與前面顧客交流,研究應如何選購。

已買到滿手戰利品的他看來有點狼狽,不過遇上路過粉絲要求合照及簽名,他都有求必應。隨後他再到附近花店,左挑右選後落訂,不難推斷是買花氹太太。前後逗留不過20分鐘,已完成所有「任務」,認真快靚正。

留港開工

事後記者聯絡上任達華,他笑說:「離開咗咁耐,點都要做啲嘢氹太太同囡囡嘅,佢哋收到禮物都好滿意。(過完年幾時復工?)其實我年三十晚都已經為新戲試造型,今次會喺香港拍,唔使離開屋企人嘞。」另外,囡囡晴佳日前換上紅色連身裙,扮到靚一靚拍照上載到社交網分享,相當吸睛。

任晴佳配合過年傳統,着到紅噹噹。
任晴佳配合過年傳統,着到紅噹噹。