伍仲衡欽點演出 否認偏心 鍾柔美加緊練歌 挑戰四面台

著名音樂人伍仲衡將於10月16及17日假九展Star Hall舉行兩場《伍仲衡再搞花臣音樂會》，廣邀歌手朋友做嘉賓，聲夢學員鍾柔美（Yumi）及冼靖峰（Archie）亦會加入，伍仲衡指定女方跳唱，Archie則要邊彈鋼琴邊唱歌，但否認偏心2人︰「我睇住佢哋進步，最初覺得Archie唔係咁顯眼，直到見佢彈琴就覺得好驚喜！」並讚Yumi跳舞時似星星發光，跳舞細胞猶如已入血，非常有天分。

Yumi坦言好開心首次挑戰四面台︰「畀咗個目標自己，要做得比之前更好。冇諗過完咗麥花臣騷之後，咁快可以踏上其他舞台做嘉賓。雖然開咗學，但會分配好時間練歌，覺得幾有挑戰性，畀多啲耐性自己就一定Handle到。」續說閒時會多些做網上直播跟粉絲互動，同時可趁機練唱。

冼靖峰辭高薪厚職

至於Archie自爆已辭掉銀行的高薪厚職，專心做全職歌手，希望可以闖出一番事業，不過他自爆當初被家人投反對票︰「直至決賽前都係唔贊成，擔心我學壞、唱歌搵唔到食，最驚我3分鐘熱度！但佢哋睇到我決賽嗰晚嘅表演，感受到我嘅熱誠，就放心畀我去，決賽後正式辭職。」問到有否擔心冇錢開飯？他笑言︰「點都會有嘅，希望之後有自己新歌，有日可以喺紅館開騷。」