伍富橋回應「億萬駙馬」綽號 直言養得起自己 心痛太太被評頭品足自覺有所虧欠

伍富橋（Alvin）與太太梁兆楹（Shirley）於2022年結婚；據悉，Shirley父親從事物流業及食品等生意，擁有兩間麻將館，身家以億計算，二人結婚後居住於西貢相思灣5千呎豪宅，並不時周遊列國，伍富橋因而被標籤為「億萬駙馬」。比起伍富橋嘅音樂事業，外界更為關注佢嘅婚姻生活，日前伍富橋宣傳新歌《一劇之本》，講起心痛太太唔係公眾人物，但就被人評頭品足。

伍富橋當年透過參加《超級巨聲4》入行，日前接受媒體訪問，提到自己已入行10年，不過直言一隻專輯都冇出過，感到可悲；過程中試過半轉行去做健身教練，但因鍾意唱歌嘅初心而努力走落去，又表示太太義無反顧支持自己，未來嘅發展方向希望將繼續出歌，同時計劃再拍劇。對於「億萬駙馬」綽號，伍富橋表示自己副業月入約4至6萬，可以養得起自己，但正常唔會拎份糧單畀人睇，認為太太嘅家底與自己無關，結婚後並唔會擁有對方嘅家底，坦言一開始好介意負評，但相反太太EQ同IQ高，快過佢消化成件事，又安慰佢可以用另一個方向去諗，表示娶到Shirley感到滿足同感恩。伍富橋又指好心痛唔係公眾人物嘅太太被評頭品足，例如係對佢樣貌及身材嘅指控，自覺虧欠太太。

對於伍富橋嘅回應，有網民覺得伍富橋追到富貴太太Shirley係佢本事，認為點解女人可以嫁有錢人，但男人就唔得，仲叫其他網民有本事自己娶返個。又有網民認為伍富橋都係貪錢多過係愛情：「唔貪錢，唔通貪佢個樣咩」、「其實做到老咬都係實力嘅一種」、「你已經達成好多男人既夢想嫁啦」、「唔講真係唔知佢係歌手，點解十年都出唔到碟，自己夠唔夠勤力先？識佢個名係因為佢拋棄Bella咋」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！