雅虎香港新聞 
伍富橋 林穎彤Bella疑分手 林穎彤默認：性格唔適合
伍富橋與現年27歲的林穎彤（Bella）拍拖年多，林穎彤近年因為冧掂星夢娛樂老闆何哲圖上位，唱歌、拍劇做主持工作不斷，不過脫貧唔係單靠工作，而係高招mark住一班富貴兵團，被捧後即撇甩拍拖兩年奀星容天佑，換上高等兵伍富橋陪出陪入，有四十萬戰車管接送，不過林穎彤（Bella）與伍富橋近日傳出分手，更互相取消關注對方ig，似乎感情危危乎。
撰文、圖片：東方新地
伍富橋 林穎彤互相取消關注ig
近日盛傳林穎彤和伍富橋情盡，昨日林穎彤出席慈善活動記招時，被記者求證是否已與伍富橋分手，她眼眨淚光、強顏歡笑謂：「之前一齊宣傳，依家冇乜話題冇聯絡，因完咗宣傳，(係咪互相取消關注ig)係，不嬲都follow好少人嘅。」林穎彤更將伍富橋降呢為「朋友同事」，稱大家見面唔會尷尬，不過承認「性格非可以傾到偈做好好朋友」，更指伍富橋文靜，她活潑。被問到有否第三者介入，林穎彤稱未準備拍拖，但會考慮圈外對象。
當年林穎彤撇奀星冧伍富橋
年前林穎彤與訓練班出身奀星容天佑有兩年時間打得火熱，不過，拍完《城寨英雄》開始上位，Bella亦火速撇甩奀星，當時更搵阿媽做擋箭牌，表示媽咪反對拍拖要她珍惜前途，可惜大話好快被揭穿，冇耐已經被揭與同公司星夢娛樂的新人伍富橋過從甚密，相信錢途比前途重要！相比容天佑乜都靠自己，出身小康家庭的伍富橋，入行不久已獲阿媽打本開舞蹈學校，又揸幾十萬Tesla出入，當然更得林穎彤垂青。
林穎彤一石二鳥狂收兵有司機有小鮮肉
有高等兵伍富橋照顧周到，林穎彤出入變公主，當時有伍富橋駕駛其價值四十萬的 Tesla接載她返電視城開工，到埗先在伍富橋座駕內補妝，男方又幫她攞嘢服侍周到，早已將伍富橋治得貼貼服服的她，拍完嘢更儼如女主人，攞住車匙帶住小鮮肉師弟劉子碩出來坐順風車，更被小鮮肉氹到笑唔停，有高等兵做司機，又有潛力兵氹笑，一石二鳥都唔會搞出個「嬲」字，名副其實冧仔高手！
延伸閱讀：
