伙記辦大事 ︳TVB搵收視福將救亡 歐陽震華都失過手 呢套重頭劇成績麻麻

TVB搵曾志偉重整綜藝節目，不過今年大台收視最出事嘅唔止係綜藝，劇集亦係重災區！兩線劇未有一套跨平台平均收視（即翡翠台、網上串流7天追看及街外媒體）超過25點。而家播緊嘅《大步走》甚至連20點都冇，於是TVB安排下星期推出歐陽震華同馬德鐘主演嘅《伙記辦大事》谷起個勢，畢竟歐陽震華向來有「收視福將」之稱。

但係翻查資料，Bobby都唔一定鋪鋪中，更試過孭飛重頭劇失手！

近10年Bobby喺TVB差唔多只係一年一劇，2013年拍《情逆三世緣》期間因為「吞錯格」肺炎入ICU之後更加決定減產。睇返2010年至今7套Bobby擔正劇集，6套平均收視都超過25點，其中2010年《施公奇案II》成績最好，平均收視31點，最高39點，全年劇集收視排名第4。而2016年嘅《一屋老友記》平均電視收視點有27點，全年排第3，都保得住「收視福將」呢個招牌。

不過其餘幾套劇好似《不速之約》(2011)同《耀舞長安》(2012)，雖然分別有27同29點，但係當年排名十強不入，而同年其他劇集卡士都唔算特別。同《陀槍師姐》老拍檔關詠荷再次合作嘅《情逆三世緣》，2013年推出時反應平平，全年排第十，不過嗰年有《衝上雲霄2》、《My 盛Lady》有外援出手嘅重頭劇，難免比下去。

另外2套劇《東坡家事》（2015）同《誇世代》（2017）都係台慶劇，《誇》更加係50周年大製作，Bobby以外仲有陳豪、張繼聰、李佳芯同田蕊妮座陣，但唔代表收視有保證。《東》平均收25點，而《誇》平均嘅24點就已經計埋跨平台收視，可見反應真係幾麻麻。

當然Bobby都係有往績先至被捧成「收視福將」，過去大多數劇集都有平均30點以上收視，唔少作品都成為年度三甲，更加帶挈《陀槍師姐》、《法證先鋒》、《壹號皇庭》等劇集添食拍成系列。值得一提係，Bobby演警察角色嘅劇，收視特別好！而《伙記辦大事》係Bobby繼《法證先鋒II》之後，事隔12年再演警務人員，呢套方程式係咪真係會有好成績？好快就知！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！