佐敦新開 清新和風居酒屋 啡酒兼備 推介特色串燒雞皮虎蝦

·3 分鐘文章

本木、串燒、清酒、居酒屋,全部都令人聯想起日本!就去轉佐敦,嚟一趟偽日本之旅吧。佐敦新開咗一間感覺清新嘅摩登居酒屋,不過日頭去嘅話,開揚嘅落地玻璃透進日光,則令呢度加添咗幾分日系café嘅感覺。

佐敦新開 清新和風居酒屋 啡酒兼備 推介特色串燒雞皮虎蝦
佐敦新開 清新和風居酒屋 啡酒兼備 推介特色串燒雞皮虎蝦

晴舍由專業咖啡師同唎酒師共同創立,店內當然就會大力推廣精品咖啡同清酒、精釀啤酒文化啦~ 食物方面,則以適合配襯茶啡酒嘅和洋食同日式串燒為主,部分食材更由日本進口。

酒盜芝士(左)、燒魔鬼魚魚鰭(右)
酒盜芝士(左)、燒魔鬼魚魚鰭(右)

推介幾道佐酒前菜,以鰹魚腸漬混合忌廉芝士製作嘅酒盜芝士,鹹鮮味濃,配搭清酒層次更見豐富,連帶清酒嘅味道都變得甘香;燒魔鬼魚魚鰭帶有陣陣炭烤香味,微甜有嚼口,又係好啱一啖魚鰭一啖酒,而且好容易就會食唔停口。

蟹味噌甲羅燒
蟹味噌甲羅燒

去親居酒屋都要食嘅蟹味噌甲羅燒,自然亦係必點item。一上枱已經開到陣陣膏香,撈勻鵪鶉蛋再搽多士食,淡淡鹹鮮慢慢滲出。

 (左至右)燒免治雞肉棒、燒大蔥薩摩赤雞、燒雞皮海虎蝦、燒十勝豚腹肉
(左至右)燒免治雞肉棒、燒大蔥薩摩赤雞、燒雞皮海虎蝦、燒十勝豚腹肉

串燒選擇多,無論係肉類定菜蔬都有得揀,比較特別嘅有燒雞皮海虎蝦,以雞皮包住6吋長嘅海虎蝦,經從日本訂製嘅串燒爐燒過後,陣陣炭火香,而且外層雞皮脆卜卜,蝦肉爽彈,多重口感。燒免治雞肉棒同樣推介,師傅特意喺雞肉中加入埋雞軟骨,增加咬口。塗上加入雞汁混製嘅自家醬汁同生雞蛋汁先至係王道。

燒金鑽鳳梨面層帶有微焦,係香甜嘅。
燒金鑽鳳梨面層帶有微焦,係香甜嘅。
熊本A4和牛串燒 (西冷、肉眼)
熊本A4和牛串燒 (西冷、肉眼)
虎蝦天婦羅鍋燒烏冬
虎蝦天婦羅鍋燒烏冬

溫馨小提示,想食串燒嘅朋友仔,要晚巿去啊。餐廳下晝暫時主力供應和洋定食,包括虎蝦天婦羅鍋燒烏冬、刺身魚生飯、吉列廣島蠔定食等。

松屋式手沖咖啡
松屋式手沖咖啡

咖啡迷嚟到應該會幾興奮,由冷泡、冰滴、虹吸、手沖到拉花咖啡呢度通通都有,而且更可以品嘗到源自日本其中一種最古老嘅手沖咖啡方法——松屋式手沖咖啡。有別於一般嘅沖製方法,松屋式手沖咖啡先會將咖啡粉挖窿撥開,以高水柱增加水流重力,再加蓋悶蒸,既可萃取咖啡粉中嘅精華成分,亦可令咖啡味道變得更穩定。老闆更自設炒豆工房,由採購咖啡生豆到烘焙都一手包辦,按照每款豆嘅特性而喺沖調同烘培方面作出調整,啡迷有口福了。

即將會供應的精釀啤酒及清酒
即將會供應的精釀啤酒及清酒

酒迷亦同樣得到滿足,餐廳將會供應多款On Tap嘅本地品牌精釀啤酒,例如大家都好熟悉嘅hEROES、Carbon Brews、大圍啤同少爺啤。另外,老闆亦親自挑選咗約廿款嘅清酒,準備嚟緊按住清酒薰、爽、醇、熟四大特色嚟配搭唔同菜式。佢哋重預告遲啲會推出以咖啡、清酒、Gin酒同埋茶嚟調配cocktails𠻹。

晴舍
晴舍

晴舍
地址: 佐敦德成街2號本木1樓

文、相:Kar

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能