佐敦新開 清新和風居酒屋 啡酒兼備 推介特色串燒雞皮虎蝦

本木、串燒、清酒、居酒屋，全部都令人聯想起日本！就去轉佐敦，嚟一趟偽日本之旅吧。佐敦新開咗一間感覺清新嘅摩登居酒屋，不過日頭去嘅話，開揚嘅落地玻璃透進日光，則令呢度加添咗幾分日系café嘅感覺。

晴舍由專業咖啡師同唎酒師共同創立，店內當然就會大力推廣精品咖啡同清酒、精釀啤酒文化啦~ 食物方面，則以適合配襯茶啡酒嘅和洋食同日式串燒為主，部分食材更由日本進口。

推介幾道佐酒前菜，以鰹魚腸漬混合忌廉芝士製作嘅酒盜芝士，鹹鮮味濃，配搭清酒層次更見豐富，連帶清酒嘅味道都變得甘香；燒魔鬼魚魚鰭帶有陣陣炭烤香味，微甜有嚼口，又係好啱一啖魚鰭一啖酒，而且好容易就會食唔停口。

去親居酒屋都要食嘅蟹味噌甲羅燒，自然亦係必點item。一上枱已經開到陣陣膏香，撈勻鵪鶉蛋再搽多士食，淡淡鹹鮮慢慢滲出。

串燒選擇多，無論係肉類定菜蔬都有得揀，比較特別嘅有燒雞皮海虎蝦，以雞皮包住6吋長嘅海虎蝦，經從日本訂製嘅串燒爐燒過後，陣陣炭火香，而且外層雞皮脆卜卜，蝦肉爽彈，多重口感。燒免治雞肉棒同樣推介，師傅特意喺雞肉中加入埋雞軟骨，增加咬口。塗上加入雞汁混製嘅自家醬汁同生雞蛋汁先至係王道。

溫馨小提示，想食串燒嘅朋友仔，要晚巿去啊。餐廳下晝暫時主力供應和洋定食，包括虎蝦天婦羅鍋燒烏冬、刺身魚生飯、吉列廣島蠔定食等。

咖啡迷嚟到應該會幾興奮，由冷泡、冰滴、虹吸、手沖到拉花咖啡呢度通通都有，而且更可以品嘗到源自日本其中一種最古老嘅手沖咖啡方法——松屋式手沖咖啡。有別於一般嘅沖製方法，松屋式手沖咖啡先會將咖啡粉挖窿撥開，以高水柱增加水流重力，再加蓋悶蒸，既可萃取咖啡粉中嘅精華成分，亦可令咖啡味道變得更穩定。老闆更自設炒豆工房，由採購咖啡生豆到烘焙都一手包辦，按照每款豆嘅特性而喺沖調同烘培方面作出調整，啡迷有口福了。

酒迷亦同樣得到滿足，餐廳將會供應多款On Tap嘅本地品牌精釀啤酒，例如大家都好熟悉嘅hEROES、Carbon Brews、大圍啤同少爺啤。另外，老闆亦親自挑選咗約廿款嘅清酒，準備嚟緊按住清酒薰、爽、醇、熟四大特色嚟配搭唔同菜式。佢哋重預告遲啲會推出以咖啡、清酒、Gin酒同埋茶嚟調配cocktails𠻹。

晴舍
地址: 佐敦德成街2號本木1樓

文、相：Kar