何廣沛朱晨麗被爆秘遊曼谷慶生

朱晨麗與何廣沛
朱晨麗與何廣沛

無綫花旦朱晨麗與上位小生何廣沛,一直被指佢哋因拍攝劇集《超時空男臣》時戲假情真,至今緋聞已經傳足兩年幾,雖然佢哋未有公開承認戀情,不過佢哋曾經被影到私下約會之外,佢哋亦經常喺社交網站打情罵俏。正當唔少人都等緊佢哋承認戀情嘅時候,今日就有報道指為咗慶祝何廣沛生日,佢哋已經飛咗去泰國旅行啦!

《超時空男臣》截圖
《超時空男臣》截圖

有傳朱晨麗與何廣沛喺拍攝《男臣》期間,已經非常sweet,經常等埋對方收工一齊去食宵夜。《男臣》出街後,佢哋嘅角色小太監「小冬」同埋「二小姐」深受觀眾歡迎,朱晨麗更憑「二小姐」一角喺台慶頒獎禮上獲得「最佳女配角」。「朱何戀」除咗得到唔少網民嘅祝福之外,連公司無綫都開埋綠燈,呢對緋聞情侶早前再次合作拍攝新劇《大醬園》,喺劇中飾演一對歡喜冤家,簡直係攞正牌,奉旨談情對足幾個月。

朱晨麗與何廣沛喺《大醬園》中飾演一對歡喜冤家
朱晨麗與何廣沛喺《大醬園》中飾演一對歡喜冤家

《大醬園》早前已經煞科,何廣沛就趁新劇《愛美麗狂想曲》嘅空檔,就同放緊假嘅朱朱去泰國曼谷旅行。報道指佢哋喺前日(6日)出發,何廣沛戴上黑色Cap帽,而朱朱就戴白Cap帽,佢哋兩個都冇戴上口罩,表現得大大方方。雖然佢哋都係正值上位嘅小生花旦,不過都係選擇乘坐經濟艙,仲被安排坐第一行,何廣沛仲好有風度咁讓走廊位俾朱朱。落機後,佢哋齊齊喺行李輸送帶旁邊等行李,期間朱朱都有落手落腳幫忙。今次嘅曼谷之旅,佢哋仲與一班朋友同行,除咗過海關嘅時候並排而行之外,其他時間都好避忌,盡量保持距離。

被傳媒問到秘遊泰國嘅時候,朱朱就回覆話今次係同十幾個朋友一齊去泰國玩,幫何廣沛慶祝生日。至於係唔係公開戀情?佢哋口徑一致表示係了解中嘅朋友。

朱晨麗與何廣沛
朱晨麗與何廣沛
朱晨麗與何廣沛
朱晨麗與何廣沛