作得又唱得 外國公司招手 「超人媽咪」受女兒打動 汪詩詩轉軚准入行

「宇宙最強」甄子丹與太太汪詩詩育有一對子女，詩詩既是賢內助，打點丈夫的事業，同時不忘栽培子女成材，可謂超人媽咪！女兒甄濟如音樂才華爆棚，詩詩曾被其作品感動到喊，終轉變心意開綠燈讓女兒入行。

甄子丹與太太汪詩詩身處內地，仔女則留港，詩詩透露今年是首次未能一齊慶祝母親節，她笑說：「睇吓老公識唔識做，會唔會提醒仔女安排啲節目畀我，隔住電話唱首歌都好吖！」提到女兒甄濟如（Jasmine）成功考上美國著名音樂學府「伯克利音樂學院」，成為王力宏及歐陽娜娜師妹，詩詩指女兒很早開始作曲、作詞兼自彈自唱，15歲已有外國公司想簽她，2年前她帶女兒到錄音室錄歌，監製更提議女兒將作品賣給其他歌手，可謂後生可畏！

入錄音室聽到喊

問到想不想女兒入行，詩詩坦言很矛盾，一方面認同她的才華，覺得應該讓全世界的人看到她，另一方面又深知演藝圈辛苦：「我以前會反對，但依家由得佢決定，因為佢啲歌真係好得，如果佢想入行，我會接受。記得去年我帶佢去錄音室，佢唱咗首為公公創作嘅歌，首歌係佢喺公公死後10日創作，我同媽咪聽完都忍唔住喊。我將首歌放上網，好多人都話感動，我發覺音樂真係好有力量，所以唔再反對佢入行。」

至於15歲細仔甄濟嘉（James）同樣有音樂天分，兩姊弟曾同台演出，詩詩說：「佢唔係好識睇譜，但聽到一首歌就可以彈番出嚟。」James鍾情電影音樂及配樂，曾彈奏電影《鐵甲奇俠3》主題曲並拍片放上網，竟吸引該片的配樂大師Brian Tyler留言稱讚「This is awesome」，認真犀利！

學懂爭取「Me Time」

詩詩兼顧子女學業及打點子丹的事業，處理得頭頭是道，絕對是超人媽咪！問到如何取得平衡，她謙稱仍在學習中：「每個階段都唔同，我近年明白要畀時間自己，以前完全冇自己時間，只係專注公司同小朋友，好多時會唔開心同發忟，但有自己嘅時間，再做其他嘢反而效率更好。」