佳節食滯點解決?原來除咗中藥 針灸花茶都幫到手!|黎小慧中醫師
早前農曆新年,好多人都趁機會放縱一下食咗先講,話口未完就食到個胃頂住頂住唔舒服。平時約一大班朋友食嘢,都好容易唔覺意食多咗,唔想跌入食滯唔舒服嘅惡性循環,點解究好?中醫叫呢啲做「胃痞」,係好常見嘅都市病,通常食得太多肥膩煎炸食物就會發作,覺得胸口脹住唔舒服兼冇胃口。
食得太多容易胃氣脹
有啲朋友一放完農曆年假,返到公司覺得冷氣唔知點解好似特別凍,同時又覺得胃脹難忍,嚴重到連放食 lunch 都唔願落街,寧願留响 office 休息。中醫稱呢種症狀屬於脾胃虛寒型胃痞,通常係因為飲食失調,或者食咗生冷食物等令脾胃受損所引致。
相反,如果胃脹得嚟覺得口乾、出汗,加埋大便秘結等症狀,就可能係有「胃火」積聚,就算同樣係胃氣脹,响中醫角度原來都分為唔同種類,自然唔可以一刀切用相同嘅方法去處理啦。
所以,中醫師會先診斷到底屬於邊一種胃氣脹,然後再對症下藥,開藥同針灸固然係最有效嘅方法,除此之外,中醫師仲會教你點樣透過食療,例如 tea break 嗰陣飲邊款花茶舒緩一下。
飲飽食滯,花茶幫到手
例如玫瑰花具有疏肝解鬱嘅功效,一般常用以緩解胃氣滯痛,好多同事平時都識得買定放响 office。不過唔講唔知,原來薰衣草、洋甘菊、茉莉花都一樣對緩減胃部不適有幫助,尤其係用嚟對付因為緊張而引起嘅胃痛。不過,因為每個人嘅體質各有不同,所以最好係問番中醫師,自己適合飲邊一款花茶就最穩陣。
另外,一啲簡單嘅穴位按摩,其實都可以紓緩胃部不適,下次唔舒服嗰陣,記得順便請教吓中醫師,學番幾招點樣按壓適當穴位,平時幫自己調理吓腸胃,就能夠幫助身體機能重拾平衡,經常保持健康醒神,醫生都睇少啲㗎!
本文作者:黎小慧中醫師(註冊中醫師,南方醫科大學中西醫結合臨床醫學博士)
更多相關文章:
大馬女神林明禎分享keep fit心得:美胸纖腰是這樣練成的