侵權爭議唔止阿元來了!究竟飲食界有冇知識版權?

雅虎香港新聞
圖片來源:「阿元來了-西環」fb
圖片來源:「阿元來了-西環」fb

家傳秘方、秘製食譜往往關係到食肆嘅生死存亡。最近台灣食店「阿元來了」老闆阿元喺Facebook發千字文,哭訴由母親傳承落嚟嘅秘方俾資深員工偷咗,仲喺香港鬧市開舖,無論裝修、佈置、菜單,以至經營方式都抄到十足十。

被指抄襲嘅舖頭,2位老闆娘早前仲接受訪問,大力推介餐廳嘅傳統台灣食品,例如芋圓、魯肉飯同豬腳飯等。對此網民反應兩極,有網民話2位老闆娘嘅口音,聽落似內地人多過台灣人,並留言為阿元嘅遭遇不值;但亦有網民話:「老闆自己都有責任,既然係家傳秘方,就唔應該輕易交俾員工。」

飲食界版權爭議 本地薑過江龍都不時中招

事實上,好似阿元呢類飲食界嘅版權爭議,可以話係屢見不鮮,無論係「本地薑」或「過江龍」都不時中招,小編就搜集咗啲個案俾大家參考。

1.台灣「乾杯燒肉居酒屋」與香港「乾杯串燒居酒屋」

乾杯燒肉居酒屋係台灣連鎖燒肉店,與香港嘅乾杯串燒居酒屋只係一字之差。台灣有「親親五花肉」活動,即係凡2位客人接吻10秒並用相機拍下親嘴照,就可獲贈五花肉,香港都有類似接吻送禮物嘅活動。不過,台灣營運商表示無喺香港開分店,乾杯串燒居酒屋店員亦否認係台灣分店。

2.台灣「馬辣頂級麻辣鴛鴦火鍋」與香港「馬辣台式鴛鴦火鍋」

兩者同樣都係以任食麻辣火鍋為賣點,商標底色都係紅色,但字形就有啲唔同。台灣馬辣國際餐飲集團話旗下門市多數座落喺台北,並指香港馬辣唔係台灣馬辣。

3.灣仔「再興燒臘」與浙江「香港再興」

曾獲飲食殿堂「米芝蓮美食推介」嘅灣仔「再興燒臘」亦懷疑遭內地食肆侵權。15年於折江紹興有間名為「香港再興」嘅燒臘飯店,寫明係香港分店,仲推出特許經營權。抄人店名不特止,仲要學人招攬加盟店,再興燒臘傳人認為對方抄到足,為此非常憤怒,並保留法律追究權利。

4.皇茶與喜茶

最近喺香港開咗幾間分店嘅喜茶,旺起上嚟要排幾個鐘先有得飲。原來喜茶最初叫「皇茶」,因為店名攞唔到註冊而被瘋狂抄襲,最終被迫改名。

從上述例子可見,飲食界嘅版權似乎無乜保障,唔好講話店名、菜式或者推銷手法無註冊,就算註咗冊,只要稍作改動就唔算抄襲,難怪業界資深人士都話,呢類個案好多時都係口同鼻拗。

做飲食靠嘅無非靠「手藝」,註冊成專利亦好難防止秘方外洩,即使係家庭式經營,為咗版權興訴訟亦時有發生。所以小編認為,建立好良好口碑好重要,食物整得好、價錢合理而服務質素高,被侵權冇有怕!

來源:「阿元來了」老闆稱大陸員工偷家傳秘方在港開店 食客:支持正版

台著名食肆 港現高仿店「乾杯」抄足接吻橋「馬辣」商標十足十

內地山寨「再興」抄到足 米芝蓮燒臘店聲言追究

相關字:

阿元來了 家傳秘方 飲食界 版權 台灣食店

你可能還想看