【俊傑新世代】夾公仔機與「衝動消費」

Prof J、仲尼爸爸
親子頭條
0379
0379

 仲尼:兄弟,唔知你最近有冇留意到,市面多咗好多夾公仔機,有啲商場甚至連開十幾間舖位,全部都係夾公仔機,然後圍住好多學生哥不斷入錢呢?

Prof J:當然有啦,夾公仔機喺近年已經成為熱門生意,更加有唔少打住幫人創業旗號嘅公司,喺各大社交網站賣廣告,宣傳投資夾公仔機。不過你講到好多學生玩夾公仔機呢件事,莫非你又有關於親子理財嘅意見想分享?


仲尼:根據我嘅觀察,呢門生意現金流的確非常強勁,隨時幾分鐘已經有過千蚊收入!因為無論係十幾歲學生哥,或者由父母帶住嘅幾歲小朋友,玩夾公仔機嘅時候,都係抱住「夾不到誓不休」嘅心態,結果就愈玩愈多錢,就算最後真係夾到公仔,用喺佢身上嘅錢,隨時已經係個公仔本身價值嘅好幾倍。


Prof J:夾公仔雖然唔係正式購物,但都係屬於消費嘅一種,佢就係捉到玩家嘅心理,令佢哋不自覺地愈使愈多錢。


仲尼:所以,呢個絕對算得上係「衝動消費」,即係「未經深思熟慮」嘅消費。據我所知,坊間嘅夾公仔機都已經調教好電腦程式,會根據裏面產品嘅價值以及每局嘅收費,設定中獎機率,少至每6鋪就有一鋪中獎,但我亦見過有家長為咗幫小朋友嬴得一個心儀公仔,竟然玩咗20幾鋪先至中獎!如果以每局大約5蚊嚟計,佢為咗嬴得呢個公仔,其實已經使咗超過100蚊,仲貴過直接去買呢個公仔喇!


Prof J:呢個心態,有啲似買股票蝕咗錢之後「溝貨」。因為反正都已經付出咗咁多,但仍然一無所得係非常蝕底,所以就不自覺地投入更多,希望最終羸到個公仔嚟「翻本」。


仲尼:無錯!好多時因為小朋友堅持,或者父母本身要面子,甚至學生哥想威畀女同學睇,就俱使佢哋泥足深陷。所以呢種遊戲就係充份掌握大家「衝動消費」嘅心理,因為玩家好難利用極少嘅消費,就能夠贏得獎品,試問世上有幾多夾公仔達人呢?所以大部分人都會「玩開繼續玩」,直至贏到公仔為止。呢種「衝動消費」,係會影響家長或小朋友嘅消費預算,甚至學生哥嘅儲蓄計劃,隨時用咗全個禮拜嘅零用錢都唔出奇。所以喺玩之前,不妨冷靜落嚟,「停一停,諗一諗」,睇吓自己係咪真係咁需要、咁鍾意呢個公仔。否則當你入錢玩第一鋪嗰一刹那,就已經墮入心理陷阱。


Prof J:我亦想分享一個經濟學詞彙,叫做「沉沒成本」,即係付出之後,不能收回的成本。如果玩家改變諗法,喺夾公仔之前先設定一個「止蝕點」,例如玩50蚊,無論夾唔夾到都會收手,當呢50蚊用完仍然一無所得,就嚴格遵守「止蝕」,呢50蚊就會成為「沉沒成本」。如果你能夠將嗰50蚊視為已出之物,作出「撇帳」,摒除厭惡損失嘅心理,而拒絕增加「投資」,就能夠避免之後導致更大損失,以免喪失理性,花咗更大筆錢之後,先至發現係一場空。呢一點,家長們不妨深究下。

 

作者:

b
b

何文俊(仲尼):《都市日報》財經主編,於傳媒行業打拼十數年,不忘初心直言無諱,亦愛化繁為簡,將複雜財經及地產資訊,以簡單生活化詞彙告訴讀者。

a
a

相關內容

想追蹤更多最新最好的親子資訊?請瀏覽我們 親子頭條專頁

你可能還想看