保錡神還原《倒轉地球》 被推攞「最喜愛歌手」 陶大宇:大家開心就得!

保錡眼睩睩扮陶大宇唱《倒轉地球》,連唱腔都似到十足。
保錡眼睩睩扮陶大宇唱《倒轉地球》,連唱腔都似到十足。

「師奶殺手」陶大宇最近風頭十足,在內地演唱《倒轉地球》Hit爆,其「水撥式」舞姿更成為網民熱話,連ERROR成員保錡亦拍片模仿「致敬」,糖妹亦忍不住讚前輩「可愛」,許廷鏗則想當導師「調教」一番!

近期人氣勁過男團MIRROR的陶大宇,憑一首《倒轉地球》為大家帶來不少歡樂,連ERROR成員保錡亦拍片致敬,並留言:「最近大愛一首歌,不得不重唱一次,無論表情和語氣都表現得十分到位,所以決定表演給大家看,重複睇了100次的《倒轉地球》。」他還貼心地上載「獨唱版」和「合唱版」,方便網民對照。未知網民是否太迷戀大宇,更為他開設群組「我老婆鍾意咗陶大宇導致婚姻關係破裂關注組」,極速吸引6,300人加入!

大宇昨日受訪,問有否為保錡的致敬片嬲豬?他大方說:「我冇嬲,佢之前都扮過我啦!最緊要帶到歡樂畀大家,大家開心就得!(同ERROR合作?)咁要提早通知一聲!」談及網民為他開設社交群組,他說:「我有留意,笑到喊,真係好有創意同好抵死!」對於有網民推舉他拎叱咤「我最喜愛的男歌手」,他搞笑說:「佢哋敢畀我,我就敢攞,接古天樂棒!」

許廷鏗幫手調教

大宇紅遍網絡,後輩糖妹與許廷鏗亦湊熱鬧,昨日糖妹出席活動時,邊睇片邊眉飛色舞地模仿他的唱腔,十分搞笑!她指大宇的唱腔與著名男高音莫華倫相似,大讚可愛:「佢嘅電視劇角色威風凜凜,冇諗過會有咁可愛嘅一面。(請佢上《勁歌金曲》?)可以嗎?都係好事,因為個節目需要多啲新元素,多啲前輩上嚟都好。(咁咪似《流行經典50年》?)舊歌要不停重溫,好多歌都好好聽。」

至於為ViuTV《全民造星IV》擔任導師的許廷鏗,對於有網民提議大宇加入其隊伍受訓,他笑說:「我哋女團嚟㗎喎!遲啲聽吓佢啲音準得唔得先,如果OK都可以幫手調教吓。」

糖妹讚前輩可愛,希望邀他上《勁歌金曲》。
糖妹讚前輩可愛,希望邀他上《勁歌金曲》。
許廷鏗培訓女團,唔啱陶大宇喎!
許廷鏗培訓女團,唔啱陶大宇喎!