【修例風波】蒙面城大生校內遊行 促校長公開對話譴責警暴

學生沿途高呼「還我郭位,公開對話」口號。

城市大學有近20名身穿黑衣並戴上口罩的學生,早上9時在校內舉行集會和遊行,呼籲學生杯葛稍後進行的副校對話會。

楊同學表示,校方只讓40名學生參與對話,亦不公開給傳媒以至校媒採訪,形容是「小圈子閉門會議」,明言學生即使被抽中,亦不會入內與副校長對話,直至校長郭位願意公開對話。

他們手持「杯葛閉門會議」、「公開對話」標語,並高呼「還我郭位,公開對話」及「保護學生,譴責警暴」口號,明言被抽中的學生均不會入內對話。

他們其後到對話會場外繼續高呼口號,並將寫上「亲,不要再龜縮喔」、「有種就躲回台灣,枉為一校之長」字句的紙張貼在門上,期間有被抽中參與的學生欲開門進入,但被其他學生阻止後,便戴上口罩並加入該批示威學生。

到早上10時許,一名聲稱被抽中的學生要求入內,示威學生便趁機湧入內。城大對外事務及傳訊部總監靳清松其後出現,轉述上級指,本地本科生節的對話會已取消,學生質疑是否針對本地生、校方有甚麼考慮因素。目前,學生以靜坐形式抗議。

城大學生聲明:

咁多位傳媒,城大學生,教師。點解我哋今日要朝頭早9點去呢到?

上星期三學生事務副校長葉豪盛教授係u circle同我哋對話,話學校有責任支援學生,保障學生安全,但我哋問佢有警務人員喺校園範圍武力制服學生,佢就答「我唔知,保安(冇)同我講」,我哋問佢知唔知有幾多城大嘅學生比人拉,佢又答「唔知,學生會冇同佢(我)講」,然後佢又承諾話校方會解答我哋學生問題,舉行公開對話,但我哋咁耐以嚟得到啲咩嘢?學生會一個鐘收到36條問題,然後學校冇回應過;舉行公開對話,本地生得40人嘅所謂公開對話,連地點都冇公開嘅所謂公開對話。仲有,城大校長郭位呢?學校專用嚟告老師嘅法律團隊呢?葉豪盛教授,你嘅公開對話,話保障學生安全,其實係唔係你兩個副校長嘅公關show,喺學生眼中,只係一場唔好笑嘅棟篤笑。

我哋真正要嘅,係一個公開對話,一個全部學生都可以發表問題嘅公開對話,一個可以真正承諾保護學生嘅公開對話。請問,我哋只係唔想喺ac1食下飯傾下時勢果陣,發現原來一個警察坐喺我哋隔離;我哋只係想有病有痛果陣,戴口罩唔會比人問話甚至制服。我哋只係大學生,要一個自由嘅學習環境一啲都唔過份,郭位教授,你喺呢度就最大,一校之長,學生需要你,而你絕對有能力同埋亦有責任保障呢個地方,保障學生。能夠代表一間大學嘅,唔係排名,而係學生、老師同埋你嘅管理。你已經避左四個月啦,唔可以再扮唔知扮睇唔到啦,學生需要你。



 



睇更多