俾人擺 上

【星島日報報道】過去幾日，不停有老友WhatsApp我，非常興奮報告：「喂喂，肥碌，我已投 你神聖一票喇！」 乜事呢？乃因第四屆的《香港金閱獎》公開投票，小弟就似一匹馬， 被人推 入閘，拙作《快樂退休》成「最佳生活百科書」入圍作品（究竟有乜準則評選的呢？）。另外，更杰撻撻，竟成為「我最喜愛作家」候選人。作家？小弟肯定只屬「二打六」，獲選都笑死人啦 嘛？照鏡先。 呢個《金閱獎》，最破格為選舉一半以一人一票定勝負，其他一半，則由大會評審投票。此方法，令我諗起上世紀八十年代籌備《十大中文金曲選舉》，開Brainstorming會時，力陳若要得獎名單有公信力，必須由全港市民一人一票選出，這樣才不會被指造馬，更冇人可以操控選舉。 其他與會者，皺皺眉頭，某高層提一條問題：「阿碌，若真正只由最多票的歌得獎，咁，年年選舉必定變為『譚詠麟頒獎禮』，其他歌手一律夾開食 。咁，對樂壇是否最好？兼且，阿倫一人獨大，其他歌星邊個會肯出席做配角？」 這是個非常現實又必須認真解答的問題。 「此外，歌迷會組織，動員能力驚人。你睇睇班嗌到頭筋現的假粉絲，三百蚊位，要幾多有幾多，指揮佢 點投票，真真易過借火呀！」 考慮、考慮再考慮，終於就扑槌一半一人一票直選，但另一半就由「專業評審團」去作出「公平公正」的平衡。如此，出來的結果，對樂壇發展最為有利，讓各路新人及「非人氣」巨星也有光芒。 《金閱獎》亦沿用此方法，最後獲選作品及作家能否令大家口服心服，等 瞧可也。 《金閱獎》背後靈魂，為當今公關界「女鐵人」潘麗瓊，睇住佢生呢個BB，由冇乜人睇好到會行會走，肯定付出大量血淚汗，不知頂住幾多盆照頭淋冷水。如今《金閱獎》被認定，請鼓掌！ 阿碌開咪 曾智華 專欄