雅虎香港新聞 
7大媽媽慳錢秘技！你做咗邊幾樣？
撰文:飛天中女Juicy媽
【親子王國分享】
曾經，Juicy媽都係鍾意買衫扮靚嘅少女一名，嗰陣賺幾多使幾多，鍾意買咩就買咩，得閒又去吓旅行咁，真係好鬼爽皮！
但自從做咗兩粒仔嘅阿媽之後，我發覺自己而家已經變成一個好叻R着數嘅究極師奶，為咗慳返啲錢畀囝囝去玩，真係去到盡！
1. 超級市場印花
惠康百佳萬寧屈臣氏等等等等，成日都有好多家品電器砂煲罌罉換，有時仲要係高質靚料嘅高級牌子！老實說Juicy媽結婚頭一年都有買啲靚牌子嘅家品電器，不過第二回合（當年啲嘢開始壞／爛要換過批新）就冇堅持喇，因為發現儲印花換其實好抵！所以我真係厚住面皮周圍同親戚朋友看更講我要儲印花，而家個個有唔要嘅印花都會主動上繳～
2. 網站／Facebook送飛
Juicy媽好鍾意睇戲，但如果要一家四口一齊去睇戲就實在有點太高消費，所以，逢親啲咩咩網站／Facebook Page送戲飛／體驗名額，我都一定報名參加，老公同好朋友已經畀我Tag到習以為常！有時啲Page仲會送迪迪尼或者海馬公園嘅飛，抽中咗可以慳返唔少！
3. 百貨公司減價
係人都知百貨公司啲嘢通常高質過街邊貨，但冇特價嗰陣真係好貴！所以嗰啲一年幾次嘅一田、SOGO減價日，我一定Mark schedule！
4. 登記加入媽媽會
好多奶粉、幼兒食品品牌都設有媽媽會，仲有嗰套好多人討論嘅英文教材，基本上都係免費登記入會，而且一入會就會送好多迎新禮物，包括試用裝同埋優惠券等等，有時仲有得報名聽 BB 講座，學吓育嬰資訊，抵到爛！到小朋友大啲，成日話要食老麥，我仲Join埋佢個「媽咪會」，都真係幾多優惠！
最近見Baby Kingdom出咗個叫BKBOX嘅嘢，好似話入會之後，喺論壇留多啲言就會每個月送一大盒禮物畀你，咪住先！瘋狂留言咪即係我平時做開嘅嘢囉！呢啲低成本、高回報嘅嘢，梗係要第一時間登記啦！呢嚿嘢都幾新，可能好多人未聽過，喺度開心Share條Link畀各位JM：https://bit.ly/2NTbBli
5. BB展特價貨／拎試用品
一年幾次嘅BB展可以話係父母恩物，因為好多產品都有半價或者更低折扣（心心眼）！就算唔消費，都有大量免費嘅BB用品禮物，設計精美又實用！入到去真係會失心瘋係咁攞係咁買！
6. 大量回收親朋戚友嘅二手BB用品
小朋友大得好快，衫褲、BB車、枱凳、玩具嗰啲，眨吓眼就唔啱用，所以呢類物品Juicy媽真係唔介意用二手嘢，一嚟慳錢，二嚟環保啲吖嘛！
7. 時刻留意論壇／Whatsapp／Facebook媽媽谷嘅優惠情報
加入各大媽媽論壇、網站同埋媽媽谷係每位媽媽都必定會做嘅事！因為真係好多媽媽會分享優惠情報，幾時又有BB展、邊度買嘢有折、加入咩咩會藉有嘢送等等，好多嘢睇！
寫到呢度，真係不得不慨嘆，Juicy媽嘅青春小鳥已經一去不回來……
