做節目打包鮑魚 馮盈盈霸氣:我冇做錯!

·2 分鐘文章
馮盈盈大方直認,並揚言會繼續打包食物。
馮盈盈大方直認,並揚言會繼續打包食物。

「話題女王」馮盈盈又惹是非,被爆拍攝節目時貪小便宜打包鮑魚。她昨日回應時理直氣壯,稱純粹不想做「大嘥鬼」,覺得自己沒有做錯,將來會繼續「惜」食照拎。她亦樂於接受被網民封為「國民妖精」,更大呼:「好嘢!我有稱號喇!」

愈住愈豪、不時晒名牌手袋的馮盈盈近日被爆貪小便宜,拍攝節目時攞走贊助物品,又在《big big shop感謝祭》中,相當識食叫助手攞定膠盒打包鮑魚,又食又拎!她昨日在將軍澳電視城出席無綫劇集《逆天奇案》活動時澄清:「應該係拍《天天開運王》,唔係拍《 big big shop感謝祭》,我唔會咁冇禮貌,當住咁多人面前拎走啲貨。(係咪有帶定膠盒攞鮑魚?)係呀!係年初拍《天天開運王》,因為每集煮到成枱都係菜式,每次拍完唔夠時間坐低食,台前幕後覺得倒咗好浪費、好冇衣食,所以後來大家都打包返去,唔好嘥,所以從呢個角度去諗,我唔覺得自己有做錯,做人要有衣食。當時我仲未食素,所以都有拎海鮮、鵝、雞,唔使集中喺鮑魚度。(會否唔敢再攞食物?)我覺得件事冇做錯,出發點係為環保,唔會因為有人講而改變,純粹係唔想嘥嘢。」

稱號有好過冇

此外,盈盈在《逆》劇中因介入陳展鵬與林夏薇感情,被網民封為「國民妖精」,她笑說:「我最初仲以為褒義,因為一般妖精都係可愛、活潑,原來係形容個角色,但係都成功嘅,引起討論,亦唔介意呢個稱號,有好過冇呀!仲要係國民添,我有個稱號喇!好嘢。」

同場的何依婷與劉佩玥分外養眼,前者以低胸Tube Dress上陣,後者則大騷香肩「落力」宣傳。何依婷為活動擔任司儀,期間長裙不時滑落,台上的她要扯番高條裙,幸好沒有失儀。而劉佩玥坦言劇中有吸煙場口,由於現實中的她不是煙民,拍之前都掙扎多時,於泰國拍外景時更1分鐘點了7、8支煙苦練,坦言吸了一口煙後感到頭暈。說到她與張頴康這一對甚受網民歡迎,她坦言很開心,希望收視愈來愈好。

「國民妖精」又食又拎:盈盈解釋拍攝《天天開運王》時,成枱美食,不想浪費。
「國民妖精」又食又拎:盈盈解釋拍攝《天天開運王》時,成枱美食,不想浪費。
何依婷性感上陣。
何依婷性感上陣。
劉佩玥
劉佩玥



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能