傳曾志偉將帶領「閉環天團」藝人留守電視城製作節目 無綫直接否認傳聞
本港第五波疫情嚴峻,各行各業都受到唔同程度嘅影響,而娛樂圈都不能倖免。早前更有消息指TVB喺今個星期開始「封城」三周作閉環式運作,而資訊節目《東張西望》、處境劇《愛·回家之開心速遞》及抗疫節目都喺呢個計劃入面,不過相關嘅藝人就暫時未收到通知。近日網上就流傳一張關於TVB嘅海報,大字寫上The Show Must Go On,而內容就係「獎門人」曾志偉將會帶領由10至12位藝人組成嘅「閉環天團」,佢哋將會留守電視城繼續製作節目。
另外,喺呢張流傳海報上亦有8個暫定嘅節目環節,節目如下:
《今日傾真D》
從疫情最新發展、抗疫強檢資訊,至社會大小事、娛樂熱話等等,「閉環天團」就每日熱話,與專家、名人、藝人甚至觀眾即時互動連線,詳盡講解和討論。
《聽日煮乜餸》
日日在家煮到悶?一班星級「教煮」在家中直播連線,提供煮食ideas。
參與藝人:肥媽、黎諾懿、曹永廉、陳煒、三姐、李家鼎
《示範單位》
藝人直播家居大揭秘,令觀眾大開眼界。
參與藝人:BOB、麥玲玲
《疫都可以Fit》
藝人在家直播,教你在家keep fit秘技。
參與藝人:方力申、丁子朗
《廣告直銷》
藝人以創意玩味方式直接植入節目賣廣告。
《想點就點》
觀眾點歌,主持即席唱,甚至連線原唱者獻聲。
《One Gag A Day》
就每日時事話題,以爆笑趣劇嬉笑怒罵。
《晚晚送大禮》
全港觀眾晚晚玩遊戲、贏獎品。
有傳媒向無綫企業傳訊部總監黃德慧查詢,而佢亦直接否認有關傳聞,仲話所提及嘅半閉環及節目拍攝計劃,只係TVB內部行政預算工作,而呢個籌備工作仍然進行中。最後,佢仲強調呢張網絡流傳海報唔係由TVB設計嘅節目表。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!