傳無綫將與港台合辦樂壇頒獎禮 同日舉行硬撼ViuTV《Chill Club年度頒獎禮》？

臨近年尾，又係香港樂壇開始派發成績表嘅時候啦！無綫以往都會將《勁歌金曲頒獎典禮》安排喺1月舉行（除咗2015年係同年12月舉行），不過早前就有消息指今屆將會變陣，一改傳統將於4月舉行，仲話有機會同ViuTV嘅《Chill Club推介榜年度推介》同日舉行。噚日仲有消息指無綫將會與港台合作，破天荒一齊舉辦樂壇頒獎典禮，而詳情就會喺年底公佈。若然成事嘅話，MIRROR同ERROR有機會首度亮相TVB！

以往港台嘅《十大中文金曲頒獎音樂會》喺呢個時候都會舉行「金曲」專業評審和公眾投票，不過去到今日都未有任何動靜，再加上廣播處長李百全喺日前到訪無綫電視城，引起坊間唔少揣測。有傳無綫和港台合辦頒獎典禮，更安排4月舉行，與ViuTV嘅《Chill Club推介榜年度推介21／22》硬撼，如果兩個頒獎典禮真係安排喺同日舉行，咁歌手們就未必可以出席晒兩邊嘅頒獎典禮。

港台喺接受傳媒查詢時就話《十大中文金曲頒獎音樂會》係港台嘅年度盛事，有關活動正在積極籌備緊，稍後會同大家公佈詳情。而無綫方面就話係坊間揣測，暫時唔會回應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！