傳花姐入紙成功 MIRROR有望明年殺入紅館？

正在九展Star Hall舉行演唱會嘅男團MIRROR，近日風頭可謂一時無兩，成個IG 都係佢地嘅演出片段。因為疫情限制入座率最多75％，令門票超級搶手，唔少fans都要求開紅館，等更多樂迷有得睇！而MIRROR經理人花姐早前都話，公司已經計劃出年安排MIRROR踩上紅館。

最近有報導指，花姐已經成功入紙，幫MIRROR申請紅館檔期，時間據知係年尾至明年年初。今年除夕檔期本來係安排俾上年跨年檔嘅楊千嬅，因為千嬅個show因為疫情取消，場地方面亦留定一年後嘅期俾佢，不過據報千嬅應該會放棄。另有傳釋出呢個期嘅係陳慧琳，但Kelly經理人鍾珍否認，仲話根本無入紙。

據知紅館有個期由今年12月中至明年1月初，足夠開2個演唱會，所以如果入紙成功，MIRROR紅館演唱會好有機會一係跨年，一係1月初！不過花姐未有確定，早排都係話做好而家個show先，鏡粉可以留意下，聽晚MIRROR尾場演唱會，12個仔會唔會公布好消息！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！