《兄弟幫》宣布結束!神算軒係最經典?

《Big Boys Club》前日錄影最後一集
《Big Boys Club》前日錄影最後一集

J2年青人清談節目《Big Boys Club》(兄弟幫)喺2010年2月1日起首播,唔經唔覺已經播咗差唔多10年,不過可惜前日就錄影最後一集(第2505集),而最後一集將會喺下年1月3日播出,節目正式告一段落,而主持人之一嘅林盛斌(Bob)都有喺社交網站宣布消息。消息嚟得咁突然,相信除咗主持人感到不捨之外,唔少觀眾都會好唔捨得。《兄弟幫》陪伴咗唔少人成長,不如而家就同大家回味一下啦!

主持陣容變化

節目做咗咁耐,主持當然有唔少變化啦!除咗有現時嘅主持人林盛斌(Bob)、梁競徽、王梓軒、范振鋒及陳國峰之外,其實節目都搵過歐陽靖(MC Jin)、陳偉霆(William)、關智斌、張致恆、唐嘉麟及吳業坤擔任主持。

節目內容多元化

J2台主要定位係俾年青人收睇,所以《兄弟幫》以輕鬆訪談形式進行,而節目內容都會比較貼近時下社會熱話。佢哋除咗會邀請藝人做嘉賓之外,佢哋仲會邀請唔同界別嘅人士,例如靈異愛好者、法科師傅、補習天王天后及魔術師等等。相信大家最印象深刻嘅應該係2017年「法科界MC Jin」杜慶龍師傅(龍哥)繼《Big Boys歷險記》再次現身,雖然龍哥今次冇「三七氣流一轉」,不過睇佢對負面評價嘅剖白都好好睇。

神算軒最經典

如果要講《兄弟幫》嘅經典位,相信唔少人都會答「神算軒」。喺2015年,李逸朗(Don)獲邀上《兄弟幫》作客,期間就講到自己喺北京無job接,只好去清潔抹大廈外牆嘅玻璃幫補生計,仲話一日都係得百幾蚊。喺呢個時候,王梓軒就衝出嚟話一日百幾蚊,一個月都有三萬幾。唔少心水清網民就話返足30日都係得三千幾蚊,之後仲將計錯數嘅王梓軒封做「神算軒」。

Bob被林敏驄狂寸

喺2017年,林敏驄上《兄弟幫》做嘉賓,錄影期間同主持人阿Bob擦出小火花。林敏驄除咗不時問非所答之外,佢仲呼喝阿Bob叫佢唔好嘈、串佢口窒窒、掌摑及話佢:「我以為你冇頭髮啫!腦都冇嘅!」等等,真係睇到都覺得火藥味重呀!最後阿Bob忍唔住問佢,之後林敏驄就話阿Bob遲到。事後,阿Bob就話冇事同澄清冇遲到。

張如城大駕光臨

亞洲音樂神童張如城喺2011年二度復出,佢首《中國的巨龍》真係冇得輸呀!《兄弟幫》喺嗰年都有邀請佢上去做嘉賓,喺節目中除咗問佢嘅賣點及點樣面對負面嘅批評之外,亦有講到佢嘅愛情觀。期間張如城多次爆出金句,例如問佢有冇鍾意嘅人,佢就回答話:「我係冰封的心!」及問有冇女歌迷追佢,佢就話:「有都俾皇太后破壞咗」。節目中主持陳國峰笑到流眼淚,相信一班觀眾都睇得好開心。