入圍《造星4》趙展彤12歲玩《超級巨聲》被狠批老積

《全民造星4》早前開記招，96位入圍參賽者隨即曝光，據知已經完成第一圈比賽，拍攝過程長達18個鐘，由下晝3點拍到第2日朝早9點！

話題選手除咗有余潔滢同郭嘉盈呢2位「明星名妹」之外，仲有曾經參與《超級巨聲》第一季嘅趙展彤(Val)。有趣嘅係，同佢同期參賽嘅許廷鏗已經成為《造星4》嘅導師，仲力sell舊戰友唱功好好，希望搶佢做隊友喎。

趙展彤雖然只有24歲，但係參加歌唱比賽經驗豐富，7歲就上TVB《殘酷一叮》仲成為台主。到12歲就參加《超級巨聲》，成為最年輕參加者，不過TVB為佢塑造嘅造型打扮完全唔配合年紀，令趙展彤當時被批評「濃妝」、「老積」。加上趙展彤曾經公開批評周柏豪同吳尊歌喉，又被指喺一次訪問中態度唔好兼對父母冇禮貌，形象扣晒分，完咗《巨聲》一度冇晒影。2011年，14歲嘅趙展彤現身《巨聲3》反而令觀眾眼前一亮，得到網上唔少巴打正評。

之後趙展彤一直參加各類比賽，2015年北上參加《中國好聲音4》，選唱陳奕迅嘅《謝謝儂》，即使出盡渾身解數都得唔到歡心，評審之一庚澄慶仲聽到皺晒眉頭！後來趙展彤簽過唱片公司，但係冇出過單曲，舊年以自資形式製作歌曲一償心願。

有咁多年比賽經驗，到底全力追尋歌手夢嘅趙展彤，有冇機會透過《造星4》行前一步？

按此下載Yahoo APP 9月免費送一萬個蛋撻王Q嘜蛋撻，仲有貓山王榴蓮冰皮月餅/鳳梨奶黃月餅同你賀中秋，立即下載！