全城抗炎！屋企都嘆到三層架下午茶 Tea Set外送/外賣自取推介

因應新型肺炎，唔少酒店同餐廳都開拓外賣服務，而家連Afternoon Tea Set都可以外賣自取，或安排外送服務！將自己屋企變成Home Cafe，咁就食得放心又可以繼續打卡呃Like啦。

四季酒店The Lounge 經典雙人下午茶

香港四季酒店日前新增網店，由行政餅房主廚Ringo Chan 主理，唔單止有齊各款麵包、蛋糕，連經典下午茶都可以外賣自取返屋企慢慢嘆！紙盒特別設計成四層，擺滿英式鬆餅，精緻鹹點、甜品。鬆餅係手工製作，每日新鮮烘焙。

訂購方法：於官方網站訂購後，指定日期時間到店提取

GREEN 飄香榴槤下午茶

榴槤控注意！尖東呢間酒店推出「飄香榴槤下午茶」外賣套餐，由有「榴槤王子」之稱嘅糕餅行政總廚何偉誠師傅用馬來西亞直送貓山王榴槤果肉入饌，創作出D24迷你芝士蛋糕、抹茶荔枝D24榴槤卷、貓山王榴槤布甸、榴槤斑蘭糯米糍等一系列榴槤甜品。

訂購方法：於官方網站訂購後，指定日期時間到店提取

DK Cuppa Tea 夢幻飄雪樂園下午茶

上環呢間由香薰品牌開設嘅茶室亦有Tea Set外賣自取/外送服務，而且仲包埋三層下午茶紙架！佢哋Tea Set不時更換主題，最近就係藍色嘅「飄雪樂園」，淺藍色嘅伯爵茶馬卡龍、木馬伯爵茶曲奇帶佛手柑獨特香氣，配鬆餅玫嘅瑰果醬花香濃郁。

訂購方法：於官方網站訂購後，到店提取或安排外送服務

半島酒店餅房 英式鬆餅連茶包

雖然唔係三層架，不過如果鐘情英式鬆餅嘅話，亦可以考慮半島酒店嘅經典下午茶及鬆餅Set，包括半島特色鬆餅（原味及提子乾口味）、士多啤梨果醬、酒店自家製奶油同茶包。始終係日賣超過600個嘅名店，質素自然有保證。

訂購方法：於官方網站訂購後，到店提取或安排外送服務

Fortnum & Mason 每日三轉新鮮出爐鬆餅

呢間得到英國皇家認證嘅過江龍人氣店亦新出外帶鬆餅，每日12:00、14:00，同16:00分三轉新鮮出爐，有原味同提子乾兩款口味，數量有限售完即止。去到仲可以揀埋心水茶葉同果醬呀。

購買方法：親身到店外賣

文：Cathy
圖：官方網站截圖