《全民造星3》參賽者好搶手 Ben／CY／KLAU睇定啲未同ViuTV簽約

ViuTV皇牌節目《全民造星III》上年年尾圓滿結束，一班參賽者成為搶手貨，人氣及工作量有增無減，ViuTV即時開節目《囝囝女女730》俾佢哋做嘉賓主持，當中包括冠軍嘅Ben（趙祥誠）、十強嘅CY（陳澤言）和KLAU（劉瑞祈）。好多觀眾都好關心參賽者們嘅發展，同埋佢哋會簽邊間經理人或唱片公司。正當大家以為唔少參賽者會同ViuTV簽約時，原來佢哋三個係未同ViuTV簽約，仲有不同嘅公司問津，不過佢哋都話要睇定啲。

勇奪冠軍嘅「折骨舞王」Ben，佢暫時由家姐做臨時經理人，其他屋企人會幫手篩選工作。Ben透露已經有國際品牌合作邀請，屋企人都幫手傾，佢將來想向全方位藝人發展，除咗舞台劇之外，佢都會想出自己嘅歌，Ben亦承認跟ViuTV有合作機會。

有「神經刀」之稱嘅CY，參賽前喺尖沙咀酒廊參加過歌唱比賽，奪冠軍後簽咗經理人，但到咗十強後同原本經理人解約，現由姑姐暫代經理人 。CY透露ViuTV暫時未有搵佢，不過就有其他公司向他招手。對於佢話想入華納唱片，佢就話覺得華納係間純音樂嘅公司，同埋佢又好鍾意許廷鏗，可惜對方未有邀請。

至於KLAU，佢同前公司已經完咗約，佢仲坦言話最近同ViuTV傾緊合作，亦又其他公司搵佢傾緊，但佢選擇公司嘅大前題一定係要俾佢有製作歌曲機會。另外，佢仲自爆話上年環球唱片有邀請佢加入新跳唱組合PIX3L，但佢當時選擇放棄機會，因為想搵返自己先。而家見到PIX3L啱啱出道，佢都話好開心。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！