【全民造星3】Alan力爭入10強 E-Kids出道堅紅《開始戀愛》係90後金曲

VIU TV節目《全民造星III》未開始出街，已經知道組合E-Kids成員、40歲嘅林詠倫(Alan)會參加。尋晚終於播出佢嘅參賽片段，雖然俾監製花姐「藐」跳得老套兼睇到人尷尬，但係畢竟有舞台經驗，表現穩定並得到入圍機會，仲以一番感人說話贏得尊敬。

不過最震撼嘅係，後台一班年青參加者，差唔多個個都識唱E-Kids神曲《開始戀愛》……係！其實E-Kids當年係幾紅架！

E-Kids三位成員郁禮賢（Tim)、阮民安（Tommy）及林詠倫（Alan），本來喺譚詠麟等人開設、號稱東方版Planet Hollywood嘅餐廳工作，亦因此被校長賞識。2002年，E-Kids同同公司嘅EO2及張穎詩推出合輯《魅力移動》出道。公司安排佢地主打學生市場，所以會唱兒歌之餘，情歌嘅歌詞都係講初戀情懷，難怪一班90後識唱《開始戀愛》。

三位成員嘅一頭金髮好搶眼，但亦因此被人批評太MK，不過E-Kids其實係唱作組合，負責寫歌嘅仲要係外表睇唔出嘅Tommy！

出道嗰年E-Kids得過多個新人獎，合唱嘅《魅力移動》未算係年度十大，但到而家唔少人都識哼「一分鐘贈我一分鐘」呢句。可惜2004年因為公司問題而影響E-Kids發展，最終Tim離隊作個人發展，Tommy 同Alan簽約環球，並加入Alan舊同學林中定成為新E-Kids，但只係出咗一首歌就再次玩完，正式解散。

因為被人笑形象MK，負面新聞隨之而嚟。向來都係最注目嘅Tommy繼續備受「關注」，2006年佢試過喺澳門賭錢手風唔順借貴利，搞到俾幾名大漢「的」返香港，最終要搵當時老闆林小明出手打救。同年Tommy又因為醉酒駕駛被捕，真係黑過墨斗。之後Tommy出現親喺報紙都「唔慌好嘢」，包括被指賣韓團BIG BANG演唱會假飛、歌曲MV明抄G Dragon作品等，被稱為樂壇小強！

至於Alan都唔見得有幾好景，除咗每年會考放榜都提嘅「E-Kids－5分（3個加埋）」之外，鮮有見到佢嘅消息，只係知道佢同女友家人一齊開咗間燉湯店。

2018年，E-Kids重組並且舉行三場演唱會，好多人都估唔到啲飛一日內賣晒，證明E-Kids當年真係幾紅架！