【全民造星3】Manson失準無緣決賽 黃劍文破格演出 方方雖敗猶榮

選秀節目《全民造星III》進入白熱化階段，尋晚播放另外兩場十強爭奪戰，賽果同之前網上流傳嘅一模一樣……唔通真係堅嘅？

負責抽籤嘅導師林二汶同彭秀慧以及監製花姐都唔想好似之前兩回合咁，由A/B組自己人互相廝殺，點知話口未完就抽到A組嘅Manson（張進翹）同Alina（李靜蓮）對決。

賽前被睇高一線嘅Manson，初選時被兩位導師爭住要，幾個回合小組表演又有水準，連二汶都認為佢有機會入十強。不過Manson演唱方皓玟嘅UWILC時，一開頭嘅ad lib就唔啱音，聽到評判林曉峰皺眉頭。成個表演都被導師認為失準。評判火火直言Manson由造型到台風都令佢好迷惘，要入圍只能夠靠下一位參賽者表現比佢差。

越戰越勇嘅Alina就以一段舞蹈表演迎戰，動作優美冇失手，加上真摯嘅感情，評判有讚無彈。欣宜欣賞Alina下嘅苦功，而林曉峰就睇到Alina成為藝人嘅可能性。結果Alina以4比1贏咗Manson入十強。

另一場對決就成為B組自己人打自己人，由方方對黃劍文。向來賣舞藝嘅方方亦都揀咗方皓玟嘅《666》，仲編排成為一段有關家暴嘅舞台劇，表演令人眼前一亮，火火更加大讚「好鍾意」！

至於向來形象平實嘅黃劍文，喺個人表演尋求突破，以搖滾曲風唱出FIR嘅《我們的愛》，令彭秀慧睇見大叫「好靚仔呀！！」，花姐都話「黃劍文已經贏咗自己啦」。

由於2個演出水準不相伯仲，評判似乎十分苦惱，但係最後5位評判一致投選黃劍文勝出。

今晚出場嘅會有John(林躍翰）、Judas（羅凱鈴）、AnsonBean（陳毅燊）及 Ben（趙祥誠）。如果根據流出名單，Ben同AnsonBean都會出線，唔知會唔會有驚喜？